14 patay sa police operations

MOABOT og 14 ka giingong armadong mga tawo ang napatay sa Oplan Sauron Part 2 nga gilusad sa kapulisan sa 1st district sa Negros Oriental sugod niadtong Huwebes, Marso 28.

Ang Police Regional Office 7 (PRO) 7 pinangulohan ni Brigadier General Debold Sinas, armado og 37 ka search warrants gikan sa korte batok sa mga kriminal, lakip na sa gidudahang supporters sa New People’s Army (NPA) sa Negros.

Sa 14 nga namatay human giingong ningsukol, walo niini didto sa syudad sa Canlaon, upat sa Manjuyod ug duha sa mga lungsod sa Santa Catalina, sa Negros Oriental.

Ang mga nangamatay giila nga silang Steve Arapoc, Manulo Martin, Sonny Palagtiw, pulos taga Barangay Pansiao, lungsod sa Manjuyod ug Eric Acabal, taga Barangay Kandabong sa samang lungsod.

Laing nangamatay mao ang magsuong Edgardo Avelino ug Esmael Avelino, taga barangay Panubigan, Canlaon City; Rogelio Recomono ug Ricky Recomono, taga Masulog, Canlaon; Genes Palmares, taga Barangay Aquino, Canlaon; Gonzalo Rosales, taga Barangay Pula sa samang siyudad; igon man sila si Melchor Pañares, taga Bayog; ug Mario Pañares, sa samang dapit.

Namatay usab sila si Ano Enojo Rapada, taga San Pedro, Sta. Catalina ug Franklin Lariosa, taga Talalak Sta. Catalina.

Aduna usab silay nasikop nga 12 ka mga personalidad, duha ang nakadagan sa dihang nakabantay sa kapulisan.

'NANUKOL'

Matod ni Sinas nga ang mga nangamatay ningsukol sa dihang gi serve na ang warrant. Usa ka pulis nga sakop sa Regional Mobile Force Battalion 7 naangol ug naa sa tambalanan.

Kini giila nga si Police Corporal Ian Puerto, kinsa naigo sa tiil ug paa, diin ang bala niungot.

Gitumbok nga mga Sparu elements ang napatay sa mga pulis tungod sa nakuha nila nga mga ebedensya sama sa shot gun, granada ug bala sa grenade launcher, mga subversive documents sa NPA nga ilang nakuha sa usa sa mga target.

Ang target nagpuyo duol sa usa ka police station sa syudad sa Canlaon. Aduna kini listahan sa mga pulis nga ilang gi target.

“Nanukol ni sila tanan, mao na among katingala kay basin kadtong last Sauron namo, basin naay instruction sa ilaha nga kon mang-raid ang pulis, panukol gyud mo. We believe they really hard core diha,” matod ni Sinas.

Nagduda si Sinas nga ang NPA mobawos tungod sa ilang gihimo hinungdan nga ang tanang gi augment sa Negros Oriental magpabilin ug magpaabot sa kamandoan gikan niya kon kanus-a sila makabalik sa ilang unit. AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph