DUHA ka gidudahang drug personality ang nadakpan sa sunod-sunod nga buy-bust operation sa mga operatiba sa Philippine Drug Enforcement Agency (Pdea)-Northern Mindanao sa Valencia City, Bukidnon.
Niadtong Marso 28 pasado alas 3:30 sa hapon ang operatiba sa Pdea mikasa og operasyon sa Purok 16A, Poblacion, Siyudad sa Valencia nga miresulta sa pagkasikop sa usa ka Reynan L. Marinay alyas Cabal kinsa nakuhaan og gituohang shabu nga mobalor og P13,600.00.
Lakip sa nasakmit sa iyang posisyon ang upat ka mga pakete sa gituohang shabu nga anaa sa dos gramos ang gibug-aton. Nakuha sab ang marked money nga P500 gikan sa posisyon niini.
Pagka alas 4:30 sa hapon, padayon ang operasyon sa kapulisan sa Purok 7, Barangay Batangan, susamang siyudad nga miresulta sa pagkasikop ni Erwin Bangis Ferraris kinsa lakip gihapon nga anaa sa drug watch list.
Mokabat sa P13, 600.00 gihapon nga kantidad sa gituohang shabu ang nasakmit sa posisyon niini ug nakumpiska sa posisyon niini ang unom ka mga pakete sa gituohang shabu nga moabot sab ngadto sa dos gramos.
Ang mga nasakmit nga mga ebidensya ang gidala na sa Pdea-Northern Mindanao Regional Laboratory Section alang sa masusing eksamin.
Ang mga dinakpan karon temporaryong nakadetanar sa rehas sa Pdea-Northern Mindanao kinsa gikatakdang mag-atubang og kasong kalapasan sa Republic Act 9165 kon Dangerous Drugs Act.