SORPRESANG nagpahigayon og drug test ngadto sa nagkalain-laing driver sa mga pampublikong sakyanan ang mga personahe sa Philippine Drug Enforcement Agency (Pdea)-Northern Mindanao, Marso 29.
Kini sa pagpangulo ni Pdea-Northern Mindanao Director Wilkins Villanueva ug ang iyang team uban sa koordinasyon ngadto sa Land Transportation Office LTO-Northern Mindanao pagpangulo ni Director Nelson S. Manaloto; Land Tranportation and Franchising Regulatory Boar (LTFRB)-Northern Mindanao Director Aminoden D. Guro; Police Station 2 Station Commander Police Chief Inspector Julius Clark Prisco M. Macariola IV ug Police Station 7 pangulohan ni Police Senior Inspector Breccia Ruth D. Townend.
Gipahigayon ang gitawag nga Oplan Harabas sa Westbound Integrated Terminal sa Bulua ug East bound Integrated Terminal sa Agora, Lapasan ning siyudad Cagayan de Oro.
Sa maong ihap moabot sa 21 niini mao ang van driver, 11 ang tricycle driver; 32 ang taxi driver; 44 ang sa public utility jeepney driver nga sa kinatibuk-an moabot ngadto sa 108 ka driver.
Matud ni Villanueva nga mokabat ngadto sa 108 ka mga driver ang napaubos sa drugtest ug sa migawas nga resulta giingong tulo ka driver sa taxi ang nagpositibo sa ginadili nga druga.
Gipasabot niini nga gi-implementar kini nila tungod kay ilang gibasihan ang statistics sa ihap sa aksidente sa dalan nga gakaanam og saka.
Gikan sa 2, 026 nga narekord nga insidente sa tuig 2001, ang ihap misaka sa 423 o 10 porsyento ug 599 sa tuig 2014.
Gikan sa maong traffic incidents sa 2014, mokabat sa 1,252 ang fatal ug 15,195 ka mga sakyanan ang nadamage.
Gituohang tungod sa pagmaneho ubos sa iligal nga druga sama sa shabu, ecstacy, cocaine, ug uban pang mga substances ang usa sa gituohang hinungdan sa aksidente sa dalan.
Tungod kay ang Pdea isip nag-unang ahensya nga mobatok sa ginadili nga druga gilusad kini nga programa ang Oplan Harabas.
Matud ni Villanueva dili lang dinhi matapos apan padayon pa silang mopaubos og surprise drug test sa mosunod nga adlaw.
Atol sab sa kalihukan nag-apod apod og flyers batok pagdili sa druga ang team ngadto sa mga pasahero.