TACURONG CITY -- Mitahan sa ilang kaugalingon didto sa militar ang 19 ka armadong sakop sa New People’s Army (NPA) alas 2:00 sa hapon niadtong adlaw nga Sabado, Marso 30, sa probinsiya sa Sultan Kudarat.
Misurender ang mga rebelde sa puwersa sa 33rd Infantry Battalion (IB) Philippine Army ilawom sa 6th Infantry Division (ID), 39th IB, 10th ID ug Sultan Kudarat Police Station sa President Quirino, Sultan Kudarat.
Dala sa mga NPA sa ilang pagsurender ang mga tag-as nga matang sa armas, mga landmines, mga bala ug magazines.
Ang mga rebelde ubos sa Guerilla Front Committee 73 nga naglihok sa North Cotabato, Davao Del Sur, Sultan Kudarat ug South Cotabato.
Pormal sab nga gidawat ni 6th ID Chief Major General Cirilito Sobejana ug 10th ID Chief Major General Jose Faustino ang 19 ka NPA nga misurender.
Nakadawat sab ang mga rebelde og tabang nga pinansiyal gikan kang Sultan Kudarat Governor Pax Mangudadatu.
Gikanayon ni Ka Oscar nga gikapoy na sila sa wala’y klarong pakigbisog ug gusto na nga manginabuhing magmalinawon uban ang ilang mga pamilya.
Gipamahayag ni 6th ID Chief Major General Cirilito Sobejana nga ang lokal nga pamaagi sa negosasyon sa mga rebelde nagpakita nga malampuson.
“The surrender of these CNTs shows that the localized peace negotiation led by the provincial government of Sultan Kudarat was very effective.”
“This is also a clear manifestation that those who were duped by the NPA in joining their ranks have realized that government cares for them and that they are welcome to join the peace loving people of Sultan Kudarat,” sulti ni Sobejana.
Ang mga mitahan makahimulos sa Enhanced Comprehensive Local Integration Program (E-clip) nga programa sa gobyerno sumala ni Sobejana.
Nanawagan si Governor Pax ug Sobejana sa mga NPA nga wala pa mahigmata nga mobalik na sa sabakan sa balaod samtang dili pa ulahi ang tanan.