NING panahuna, dili ikalimod nga nagkagrabe na ang bullying sa matag tunghaan. Mabuhat kini sa bisan unsang pamaagi ug mahitabo kini ni bisan kinsa nga bata nga mga estudyante, dako man o gamay.
Niini, nagtinguha si Yaw-Yan Ardigma Cebu founder/CEO Master Benigno “Ekin” Caniga nga itanom ang disiplina sa panghunahuna sa mga bata aron masanta ang bullying.
Sa samang higayon, tudloan ang batang mga estudyante nga makat-on og martial arts aron magamit kini nga depensa batok sa bullying.
“Gusto namong tudloan ang mga bata og disiplina pinaagi sa martial arts. Dili nato sila i-encourage nga mangita’g away pero mas maayo man nga naa sila makat-unan nga martial art para makadepensa sila sa ilang kaugalingon gikan sa bullying,” pasabot ni Master Ekin.
Ning maong iyang tinguha, gipasiugdahan ni Master Ekin ang tinuig nga Yaw-Yan Summer Clinic nga mosugod karong adlawa sa ilang headquarter nga nahimutang sa 4th floor sa Coast Pacific Dowtown Center sa dalan Sancianko.
Nagkanayon si Master Ekin nga tinguha sab niyang malikay ang mga bata sa temtasyon sa paggamit og ginadiling drugas.
Ang Yaw-Yan usa ka lumad nga Filipino martial arts, nga gimugna ni anhing Grandmaster Nap Fernandez. (EKA, ESL)