MOKABAT na sa P2.85 bilyones ang kadaot nga nahimo sa El Nino sa agrikultura sa tibuok nasod sud lang sa kapin sa usa ka buwan sa pagsugod sa ting-init, sumala pa sa National Disaster Risk Reduction and Management Council.
Ang labing apektado mao ang mga kahumayan ug kamaisan. Ang mga rehiyon nga grabeng naigo sa El Nino mao ang Soccsksargen ug Bicol. Nideklarar na og state of calamity ang mga opisyales sa Mimaropa, Zamboanga, Soccsksargen ug Bangsamoro Autonomous Region in Muslim Mindanao.
Ang Cebu Provincial Board mideklarar na usab og usa ka state of calamity sa tibuok lalawigan tungod sa huwaw nga nakahimo nag ladaot nga mobalor sa kapin sa P100 milyones sa agrikultura sa tibuok lalawigan.
***
Sa mga panahon nga sama niini, ang mga mag-uuma mohangad sa langit ug mag-ampo nga mo-uwan. Apan inig hangad nila sa langit ang ilang makita mao ang asul nga kalangitan, hawan kaayo ug wa gyuy mga panganod.
Nangliki na ang mga yuta sa ilang daruhan tungod sa naglagiting nga kainit sa adlaw sa panahon sa kuwaresma. Nag-anam nag hubas ang tubig sa ubang mga sapa samtang dunay mga sapa nga naughan na gyud.
Nagping-it sa kainit ang mga mag-uuma. Apan nalipay ang mga labandera kay niputi ang ilang mga linadlad ug daling nauga ang ilang mga hinayhay.
Ang Makagagahum nay magbuot kinsay paminawon – ang mga mag-uuma nga nangayog uwan o ang mga labandera nga nag-ampo nga moinit.
***
Ang Pagasa niingon nga mograbe pa ang El Nino ning buwanal - 61 porsento makasinati og huwaw.
Si Pilipina Bermudez, manager sa National Irrigation Administration (NIA) Public Information Office, niingon nga matabangan nila pinaagi sa irigasyon ang 1.5 ka milyon ka mga rice farmers apan 14 porsento lang kini sa kinatibuk-an.
Sa 3.9 ka milyon ka ektarya nga gitamnan og human sa Pilipinas, 1.2 ka milyon ka ektarya ra ang dunay communal irrigation systems samtang ang 2.7 ka milyon ka ektarya ngsalig sa uwan.