DUHA ka mga isla sa lalawigan sa Sugbo ang gitan-aw nga madeklarar nga rabies-free zones.
Ang Provincial Veterinary Office (PVO) naghikay na sa gikinahanglang mga dokumento aron madeklarar ang isla sa Bantayan ug isla sa Zaragosa sa lungsod sa Badian isip mga dapit nga way kaso sa rabies.
Si Dr. Mary Ann Gabona, veterinarian sa PVO, niingon nga ang mga isla ang kasagaran madeklarar nga rabies-free zones human dali ra masubay ang mosud nga iring ug iro sa maog mga dapit.
Niadtong 2011, ang mga lungsod sa San Francisco, Poro, Tudela ug Pilar sa Camotes island gideklarar nga rabies-free zones. (SCG)