DI mominos 20 ka mga balay ang naugdaw sa sunog nga niulbo sa Sitio Guiwanon, Barangay Looc, dakbayan sa Lapu-Lapu niadtong Sabado sa gabii, Marso 30.
Ang mga imbestigador sa Lapu-Lapu City Fire Department ningsusi na sa hinungdan sa sunog nga na-report pasado alas 9 sa gabii.
Si Regina Ybañez, kapitan sa Barangay Looc, nibutyag nga nagtapok sila mga opisyal sa barangay dihang nadawat niya ang alarma.
Si FO3 Lyndon Urbiztondo sa Lapu-Lapu City Fire Department niingon nga giisa sa Task Force Bravo ang sunog alas 10 sa gabii.
Sa pasiunang imbestigasyon, kapin sa 30 ka mga pamilya ang apektado sa hitabo.
Moabot sa 10 ka fire volunteers gikan sa mga siyudad sa Mandaue ug Talisay ug mga lungsod sa Cordova, Compostela ug Consolacion ang nitabang sa kabomberohan sa Lapu-Lapu sa pagpawong sa kayo.
Si Andy Berame, pangu sa City Disaster Risk Reduction and Management Office sa Lapu-Lapu, namahayag nga kasamtangan nga nipasilong sa gym sa barangay ang mga biktima sa sunog.
Si Ybañez nihangyo sa kagamhanan sa siyudad sa Lapu-Lapu nga tabangan ang mga nasunogan pinaagi sa paghatag og pagkaon, mga habol ug ubang panginahanglan. (SCG, JKV)