GIOKTABA ang pag-aprub sa rehabilitation plan sa kanhi Inayawan Sanitary Landfill gumikan sa kapakyas pag-sukip sa detalye sa maong proposal.
Si Konsehal Joy Pesquera nipasabot nga wa silay pagsupak sa pagtugot pagsugod sa rehab apan gusto una nila makita unsay final nga plano sa di pa i-aprub ang resolution ni Konsehal Jerry Guardo niadtong Marso 26.
Sila si Konsehal Margot Osmeña ug Raymond Garcia niuyon sa mosyon ni Pesquera diin ang konseho nigahin og adlaw para sa executive session karong Abril 23.
Si Konsehal Joel Garganera kinsa maoy nakapasirado sa kanhi landfill human iyang gihulagway nga gipasagdan sa kasamtangang administrasyon taliwa sa mando sa Court of Appeals human siya nakakuha og Writ of Kalikasan niadtong Disyembre 2016.
Ang tulo ka konsehal sa Barug PDP-Laban nga silang Pesquera, Garcia ug Garganera gustong masayod sa hingpit nga plano may labot sa rehab sa kanhi labayanan og basura.
Si Garganera sa iyang bahin niingon nga nigahin na ang administrasyon ni Mayor Tomas Osmeña og P36 milyones para sa pagkoral ug P10 milyones para pagpatag sa 15 ektaryas gikan sa naglaundok nga basura apan iyang gihulagway nga wa pay kongkretong plano.
Naglibog usab si Garganera kon nganong koralon ang landfill ug ang plano naglakip sa paghimo og eco-park ug laing kapilian mao ang pagtukod og waste-to-energy (WTE)facility.
“We appropriated and spent money but until now we don’t know what is the mode of our rehabilitation or unsay gustong mahitabo sa landfill,” padayag ni Garganera.
Dugang ni Garganera nga kon WTE ang ibutang, maglambigit kini og paglabay sa basura ug usa sa provision sa CA mao ang dili paglabay og basura.
Gumikan sa kakuwang sa ilang panahon paghisgot sa ubang aspeto sa rehabilitasyon, nisugyot si Guardo nga ipahigayon executive session karong Abril 23.
Imbitahon sa konseho ang Cebu City Environment and Natural Resources Office (CCENRO)ug Full Advantage Philippines International Inc (FAPII)kinsa maoy nag-andam sa rehab plan.
Ang FAPPI ni-propose sa pagtukod og waste to energy facility sulod sa 15 ektaryas nga labayanan sa basura ug konn gustohon sa City Government mahimo sab nga butangan og eco-park ug renewable energy center.
Si Nida Cabrera, pangulo sa CCENRO nagkanayon nga aduna nay P80 milyones nga gigahin nga pundo para sa rehab. Ang Inayawan Landfill kansang operasyon nagsugod niadtong 1998 apan padayon nga gigamit sa Cebu City hangtod niadtong tuig 2016 taliwa sa daghang violation ug nakahatag nanog peligro aa maayong panglawas.
Hingpit napasirado ang maong lugar gumikan sa Writ of Kalikasan nga giisyu sa Court of Appeals ug gipahimug-atan sa Supreme Court ubos sa paningkamot ni Garganera. (PAC)