KANSELAHON sa Land Tranportation Office (LTO) 7 ang mga lisensiya sa pito ka mga drayber nga nagpositibo sa confirmatory tests sa paggamit og gidili nga drugas sa surprise drug test sa Philippine Drug Enforcement Agency (PDEA) 7 niadtong Biyernes, Marso 29.
Si LTO 7 Director Victor Caindec nibutyag nga gawas nga kanselahon ang lisensiya, did-an usab nga makagunit og lisensiya sa tibuok nilang kinabuhi ang maong mga drayber ug pasakaan usab kini og tukmang kaso.
“Tungod kay commercial man ni sila nga mga drivers, pasabot naggamit sila og pasaheroan nga mga sakyanan, ang atoang assumption ani, professional ang ilang lisensiya. Under sa Anti-Drunk and Drugged Driving Act, ang penalty sa usa ka professional driver’s license holder kay cancellation of license and perpetual disqualification from driving,” pasabot sa director.
Matod niya, dihang nagpositibo na ang mga drayber sa initial screening sa drug test, gisakmit na nila ang mga lisensiya niini.
“At the confimatory test nga nahitabo, we will now move for the cancellation of their license,” butyag ni Caindec dihang nahinabi sa Superbalita Cebu niadtong Dominggo, Marso 31.
Wala pa hinuon niya madawat ang pormal nga report sa pagdakop ug ang case details.
Si Leia Alcantara, information officer sa PDEA 7, nibutyag nga sa pito nga nagpositibo niadtong Biyernes, Marso 29, unom niini mga PUJ drayber, ug usa ang v-hire drayber.
Unom ang positibo nga nigamit og methamphetamine hydrochloride kun shabu, lima niini drivers sa PUJ ug usa sa v-hire samtang usa sa tetrahydrocannabinol kun migamit og marijuana kay jeepney drayber.
Ang drug test subay sa gilusad nga nationwide nga Oplan Harabas “Drug Test Muna Bago Pasada.
Matod ni Alcantara, 69 ka drayber ang gi-drug test sa V-hire terminal sa Kamagayan, ug 55 sa Ayala PUV Terminal sa siyudad sa Sugbo ug 50 sa North Bus Terminal sa dakbayan sa Mandaue.
Ubos sa Republic Act 10586 kun Anti-Drunk and Drugged Driving Act of 2013, ang drayber nga masakpan nga nagmaneho og sakyanan nga ubos sa impluwensiya sa ilimnong makahubog, gidili nga drugas ug susamang substances ubos sa Section 5 sa maong balaod silotan og tulo ka buwan nga pagkabilanggo ug pamultahon gikan sa P20,000 hangtod sa P80,000 kon ang kalapasan dili moresulta sa physical injuries o homicide.
Kon ang kalapasan moresulta sa physical injuries, ang penalty ubos sa Article 263 sa Revised Penal Code o ang penalty sa mosunod nga subparagraph, o kon asa ang mas bug-at, ang multa kay gikan sa P100,000 hangtod sa P200,000.
Ang drayber nga naghupot og non-professional driver’s license nga mamatud-an nakalapas ning balaora, sakmiton ug suspensuhon ang lisensiya sud sa 12 ka buwan sa unang conviction ug perpetually i-revoke sa ikaduhang conviction.
Samtang kon professional driver’s license holder, sakmiton ug did-an na makaangkon og lisensiya sa tibuok niyang kinabuhi sa unang conviction.
Si Caindec nidugang nga ang ilang law enforcement officer sa LTO 7 ang magsilbi nga reklamante ug maoy mokiha sa mga drayber sanglit kini maoy niisyu sa temporary operator’s permit (TOP).
Ang direktor nipasabot nga magsilbi kini nga leksyon sa mga drayber og publikong mga sakyanan nga maggamit og gidili nga drugas.
“Madakpan na gani, maghilakhilak naman dayon didto. Moingon dunay pamilya, pirmero pa nila nga gamit, kato pa lang gyung higayona, the usual,” dugang pahayag ni Caindec.
Gusto sa director nga ang PDEA 7 ang nag-unang ahensiya nga mohimo sa pagdakop sa mga drayber aron ang conviction lahoslahos na ug dili sila ma-technical sa procedure. (B)