Balik-lantaw sa ika-50 ka tuig sa Mandaue
GILUSAD sa Lunes, Abril 1, ang Midyear Cultural Summit 2019 sa kagamhanan sa dakbayan sa Mandaue.
Gipahibalo ni City Treasurer, Atty. Regal Oliva, usa sa mga sakop sa organizing committee, nga gihatagan nila og gibug-aton ang cultural ug historical nga aspeto sa pagsaulog sa ika-50 nga anibersaryo sa pagka siyudad sa Mandaue.
Pagbalik-lantaw sa mga nahitabo, naagian ug mga kalampusan sa dakbayan sa Mandaue sud samniaging 50 ka tuig, ang highlight sa Midyear Cultural Summit, nga adunay tema nga ‘A Tribute to Gold’.
Gipahibalo sa mga organizer nga ilang ipakita sa tanan ang kon unsa ang natampo sa Mandaue alang sa kalambuan sa Sugbo ug sa nasud sa kinatibuk-an sa ilabi na sa natad sa kultura ug kasaysayan.
Sa matag kalihukan nga himuon, tipik sa titulo niini dunay gold o golden ug bulawan nga pulong sama sa pagbukas sa ‘Raid your golden closet’, ‘Golden Voice of Mandaue’, Golden Blast, Dance for Gold, Bulawan: Bisaya Music Festival, Bayle sa Plaza ug daghan pa.
Diin sa matag programa niini, makita kon giunsa ang pagsaulog nga masadyaon sa nagkadaiya nga ka mga kalihukan sa mga tuig 1970’s, 80’s hangtud na sa kasamtangan nga panahon.
Matud ni Atty. Oliva nga sama nalang sa Bisaya Music Festival, madungog dinha ang mga kanta sukad pa sa tuig 1970’s, ug ang bayle, diin anaa gyud ang disco balls ug ang pamaagi sa disco sa pipila ka dekada na ang niagi.
Dunay Golden Gala Night alang sa paghatag og pasidungog sa mga nakatampo sa kalampusan sa nagkadaiya nga kalihukan ug mismo sa Mandaue sa miaging 50 ka tuig ug dunay konsyerto uban ang nabantug nga si Ryan Cayabyab.
Dili mawala ang Miss Mandaue ug anaa ang Golden Empress o Mandaue Gay Pageant. Gipaila na sa media ang 16 ka mga maanyag nga contestant sa Miss Mandaue 2019 kagahapon, Abril 1.
Ang kagamhanan sa syudad sa Mandaue ang nigahin og P14.6 milyones, alang sa gihulagway nga ‘grander’ nga usa ka bulan nga kalihukan, sugod karong Abril 5, hangtud na sa Mayo 9, ang adlaw usab sa kapistahan sa St. Joseph National Shrine.