SAKOP sa Barangay Management Office (BMO) sa Barangay Toong, Siyudad sa Sugbo nasikop samtang nagdalag armas ug shabu atol sa checkpoint sa mga sakop sa City Mobile Force Company sa Buhisan road, Barangay Buhisan, Siyudad sa Sugbo, alas 11 sa Lunes sa buntag, Abril 1.
Ang checkpoint gihimo human pusila sa tulisan ang usa ka tinun-an niadtong Biyernes sa gabii, Marso 29.
Ang tinun-an namatay kay nahutdan sa dugo.
Ang nasikop mao si Redjie Cabingatan, 45, taga Barangay Toong, bukirang dapit sa Siyudad sa Sugbo.
Nakuha gikan kaniya ang usa ka improvised Frontier revolver nga adunay lima ka mga bala sa M16 Armalite rifle ug unom ka mga pakete sa gituohang shabu.
Matod ni Police Major Chuck Barandog, hepe sa CMFC sa Cebu City Police Office, nga sa dihang niagi si Cabingatan sa checkpoint, nibagal ang giluklok niini nga armas sa hawak hinungdan nga ilang gidakop.
Atol sa pag hiling sa iyang sling bag, nakuha ang pinakete sa illegal nga drugas ug gamit sa paghingos.
“Ang iyang armas iya ra mang gisukbit. So, nakita man sa atong personnel kay nigawas man ang pul-an, mao tong gisita dayon siya,” matod ni Barandog.
Gikan si Cabingatan sa iyang live in partner sa sitio Nazareth, Barangay Buhisan.
Ang armas giangkon niya nga iyang gamiton isip self defense tungod sa pagkasakop sa BMO.
Apan sa dihang gihimo na ang inventory, nireklamo na siya human mabantayi nga aduna nay mga pinakete sa illegal nga drugas nga naapil.
“Kanang armas akoa na. Pero grabeha sad anang shabu oy. Wala man ko ana. Tinuod mogamit ko kay ang katapusan nako nga suyop katong Sabado,”matod ni Cabingatan.
Ipaubos sa ballistic exam sa PNP Crime Laboratory ang armas ug itandi sa nakuhang sa pagtulis ug pagpusil patay sa usa ka tinun-an sa usa ka unibersidad sa syudad sa Sugbo niadtong Biyernes sa gabii, Marso 29.
“Possible na siya nga suspek because ang armas nga gigamit sa tinun-an sa may Tres de Abril nga incident is revolver. And ang atong na confiscate also a revolver. We will request for ballistic examination for this evidence,” dugang ni Barandog.
PERSONS OF INTEREST
Apan aduna nay duha ka persons of interest ang Labangon police station sa kamatayon ni Jovanie Pat, 21, taga sitio Ibabao, Barangay Mambaling.
Matod ni Police Brigadier General Debold Sinas nga aduna na silay hulagway sa duha ka mga suspek nga positibong gitumbok sa mga saksi.
“Ang mga nawong mga batan-on pud. They were previously charged ng robbery and theft. Some of the witnesses pointed didto,” matod ni Sinas.
Nailhan sila pinaagi sa CCTV footage sa dapit ug positibo sila nga giila sa mga saksi.
Tungod sa hitabo, iya nang gimandoan si Cebu city police director Police Col. Royina Garma nga usbon ang ilang personnel deployment aron marobingan kadtong mga lugar nga delikado sa tulis ug uban pa.
Nagduda ang heneral nga kadtong mga bag-ong laya gikan sa bilanggoan ang responsabli sa pagtulis ug pagpatay ni Pat.
Si Pat tinun-an sa Education ug mograduwar na unta karong Oktubre.
Ang iyang pamilya nanawagan sa kapulisan ug kang Cebu City Mayor Tomas Osmeña nga sulbaron ang kamatayon niini aron mahatagan og hustisya.