IPATUMAN ang hugot nga police visibility sa mga tunghaan sa pampubliko nga tunghaan sa Mandaue atol sa graduation ceremonies.
Ang Mandaue City Police Office (MCPO) niawhag sa mgatugdumala sa tunghaang publiko sa pagpahibalo kanila sa ilang graduation day aron makapahimutang og mga pulis sa lugar sa pagpakgang kon adunay magtinguha nga mohimo og kagubot.
Niadtong Abril 5 sa miagi nga tuig, usa ka ginang ang gipusil-patay sa iyang kapuyo samtang nag-attend og graduation ceremony ug recognition sa duha ka mga anak sa lungsod sa Barili, probinsya sa Sugbo.
Diin selos ug ubos sa implwensya sa ilimnon nga makahubog ang amahan, ang gitan-aw nga hinungdan sa paghimu sa kremin.
Usa kini sa nakita sa director sa MCPO Col. Julian Entoma nga angay lang nga malikayan, aron ang kalipay sa mga ginikanan, magtutudlo ug ilabi na sa mga tinun-an alang diha sa ilang pagsaulog sa kalampusan, dili mabalda.
Hinungdan nga hangyo ni Entoma sa mga principal nga unta sila sa MCPO o sa kada police station ang pahibaw-on kon kanus-a pa ang mga ipahigayon nga graduation o recognition ceremony, alang sa pagpahimutang og police visibility.
“Hangyo lang ko mga ma mug sir nga unta pahibaw-on lang, kahibalo man mo asa mo na-belong nga police station, pahibaw-a mi sa mga schedule sa graduation ceremony, kini aron mapa-rovingan o mapahimutangan og security detail sa duol sa eskwelahan alang sa seguridad sa tanan. Masumpo na ba, ang naay nagtinguha unta og dautan, makakita sa atong mga pulis, dili na mahinayon,” panawagan ni Entoma.
Lain usab nga giawhag ni Entoma ang mga politiko sa syudad sa Mandaue nga makig-alayon sa kapulisan diha sa ilang himuon nga mga pulong-pulong sa kabarangayan o pagpangampanya, aron makahimo usab og pag-roving sa lugar ang mga pulis.
Alang gihapon sa seguridad dili lang sa mga politiko, apan lakip na sa ilang mga suporter.
Buot likayan sa director sa MCPO ang posibleng kagubot dala unya sa kainit sa pagsuporta sa mga suporter sa matag kampo.
Kahinumduman, niadtong Biyernes, Marso 29, nagsugod na ang lokal nga pagpangampanya, diin kasagaran sa pamaagi sa pagkampanya mao ang caravan.