Todino: Adik nga mga drayber

UBOS sa Anti-Drunk and Drugged Driving Act, and silot niadtong mga drayber nga mapalgang positibo paggamit og ginadiling drugas mao ang pagkanselar sa ilang lisensiya pagmaniho og sakyanan.

Gawas niana, did-an na kining drayber nga “adik” pagkuha pa og lisensiya sa tibuok niyang kinabuhi. Nagpasabot, kon makahimo gihapon siya og maniho’g sakyanan, kana, wa na siyay katungod og angay ibalhog sa prisohan.

Apan, dihang napositibo siya sa paggamit sa ginadiling drugas dunay tukmang kaso ipahamtang batok niya.

Niadtong Biyernes, Marso 29, ang Philippine Drug Enforcement Agency (PDEA) sa Northern Mindanao uban sa Land Transportation Office ug Land Transportation and Franchising Regulatory Board ug kapolisan sa siyudad, naghimo og random drug test sa mga drayber sa pampublikong sakyanan sa Westbound Integrated Terminal sa Bulua ug East bound Integrated Terminal sa Agora.

Sa 108 ka mga drayber nga gipaubos sa drug test, tulo niini nga mga taxi drayber napalgang positibo sa paggamit og ginadiling drugas.

Gamay ra tuod kining maong ihap sa adik nga drayber apan dako na kana og epekto sa mga pasahero. Tiaw mo, malinawon kang nagsakaysakay unya wala diay sa insaktong pangisip ang drayber.

Wa gyuy garantiya tuod ang mga pasahero sa ilang safety kon adik ang drayber sa ilang gisakyan. Nagdagan pa lang ang sakyanan, naa na sa menteryo inyong pikas tiil.

Matod ni PDEA director Wilkins Villanueva, gihingusgan nila ang kampaniya “Oplan Harabas” gumikan sa pagsaka sa aksidenti sa kadalanan diin ang paggamit sa ginadiling drugas maoy natumbok nga numero-unong hinungdan.

Makita nato ang paningkamot sa gobiyerno paglimpiyo sa atong dalan batok niining buloyagon ug adik nga mga drayber.

Unta nuntan usab kini sa mga operator sa Public Utility Jeepney, taxi, bus o uban pang pampublikong sakyanan. Ilang i-random drug test usab ilang mga drayber alang sa safety sa mga pasahero.

Hagiton sab nato ang PDEA nga himuon nilang sobsob kining Oplan Harabas hangtod nga mahurot nga kining mga adik nga drayber.

Ang publiko o mga pasahero dunay dakong responsabilidad sab. Kon duna moy mamatikdan nga drayber nga lahi og lihok ug dunay timailhan nga ubos kini sa impluwensiya sa drugas o ilimnon nga makahubog, i-report dayon sa kapolisan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph