GIKAPUNGOT sa grupo sa Alliance of Concerned Teacher (ACT) Northern Mindanao ang mga nagpakalat nga sila mga terorista.
Gibutyag ni Ophelia Tabacon, presidente sa ACT-Northern Mindanao, dugang suholan lang ilang gihangyo karon sa gobyerno apan kini ang ibalos kanila.
“Pag-destabilize sa among organisasyon. Kami naa mi sa gobyerno nga dili unta mi dauton sa atong administrasyon nga kami nagtabang man sa atong mga tinun-an nga makaskwela. Palihog lang nga hunungon ang pagpamasangil kanamo,” kini ang gibutyag ni Tabacon.
Gisaysay niini nga niaging semana, miabot siya sa Camaman-an Elementary School ug nakurat pag-abot sa mga malisyosong poison letter o leaflets nga gipakalat sa matag tumoy sa koral.
“Daghan kaayo gipamutang kay naluoy ko sa mga bata kahugaw ba kaayo sa skwelahan. Nakuan nako akong giduolan kay sila baya dayon masugoan sa pagpamunit, pagbasa nako nga papahawon kuno kini nga grupo kay gideklarar nga persona non grata ug walay maayong buhaton,” saysay ni Tabacon ug iya kining gikondena nga hinimoan.
Dugang niini nga kung ilang grupo sa mga maestra usa ka terorista sapian na ang mga funeral parlor.
“Pananglitan kon kani tanan grupo, so kung tinoud kana nga terorista sapian na ang atong funeral parlor kay patay dinhi patay didto man gyod ang mahitabo so dako kaayo among kaulit pagpangdaot kay labina eleksyon karon nga motuo pod dayon ang uban,” dugang niini.
Hangyo ni Tabacon nga wala sila naguba sa mga programa sa gobyerno ug gani labihan ang ilang suporta sa mga tinun-an nga molampos ug wala sukad nahitabo nga ilang gihaylo ang mga kabataan.