POSIBLENG ipasara ang rekomendasyon sa Regulatory and Complaint Board (RCB) sa usa ka hotel ug lakip nga kasohan, diin na-rescue ang pito ka mga menor de edad, ang nasikop nga duha ka mga Chinese national, sa siyudad sa Cagayan de Oro, niadtong Dominggo sa gabie, Marso 31.
Gikabutyag nga napulo ka mga batan-ong babaye ug pito niini ang menor de edad gituohang biktima sa human trafficking sa duha ka mga Chinese national ug tulo ka babaye nga hingkod ang pangidaron kinsa kasamtangang anaa karon sa National Bureau of Investigation (NBI)-Northern Mindanao.
Sa pakighinabi kang Atty. Edgardo “Egay” Uy, tsirman sa RCB, nga buot niini nga e-rekomenda kining ipasara.
“Naay among galihokon kay recommendation lang among buhaton pero kami lang sa RCB daan for closure na gyud na dili pwedi nga magpadayon ang ilang gabuhaton,” matud ni Uy.
Gidugang pa nga buot niini nga pasakaan og kaso ang mga tag-iya gumikan kay dili ti-aw ang mga susama niini.
“Personally ang ako gusto gyud nga kaning mga operator sa hotel, sa mga Inn i-apil gyud, dili ni ti-aw ti-aw mga menor de edad abusohan,” dugang ni Uy.
Gidugang usab ni Antonio Resma Jr., inspectorate team leader sa RCB, nga dunay multa nga anaa sa P5,000 ang maong hotel ug pagkasarado.
Giingong nagpaabot pa usab sila sa report sa tinugyanan sa NBI ug sa City Social Welfare and Development (CSWD) aron mapahamtangan usab sa insaktong silo tang maong patigayon.
Gidugang pa niini nga mas pahugtan pa nila ang pag-edukar ug pagpahimangno sa mga patigayon ilabi na sa mga hotel kalabot na niini nga ginadili gayud ang pagtugot sa mga menor de edad nga mosulod sa mga hotel kung dili kauban ang mga kapamilya.
“Yes murag naa pa gyud need sa atong information and education Campaign para ma-aware atong business operators ug ang public sa mga regulations. Pero kani sad nga incident nagpasabot nga aware na ang publiko kay naa naman nag report, pasabot sila mismo ga tabang na sad sa atoa sa pag monitor,” dugang niini.
Nagpasalamat usab kini gumikan kay nagpasabot lamang kini nga nitabang na ang katawhan sa pagmonitor. Nasayran nga hugot ang kampanya sa RCB aron nga malikay ang mga kabataan nga mabiktima sa mga susama niini.