NAALARMA ang Regulatory and Complaint Board (RCB) nga susama ka mga kinahon nga condoms ang nakita sa usa ka hotel diin na-rescue ang ubay-ubay ka mga menor de edad, sa Barangay Cugman, dakbayan sa Cagayan de Oro, sa alas 11:30 sa gabie Dominggo, Marso 31.
Kasamtangang anaa sa tinugyanan sa National Bureau of Investigation (NBI)-Northern Mindanao ang duha ka mga Chinese national, ug laing duha ka giingong bayot nga gituohang bugaw.
Ang 10 ka mga babayi nga na-rescue, diin pito niini ang mga menor de edad, kasamtangang anaa sa tinugyanan sa City Social Welfare and Development (CSWD).
Gidugang pa nga duha niini sa pito ka mga menor de edad ang na rescue na usab sa laing hotel.
Matud ni Antonio Resma Jr., inspectorate team leader sa RCB, nga posibleng taod-taod na ang mga biktima sa nahisgutang hotel ug gani naalarma sa nakitang mga condom.
“Base sa photos (hulagway), posible kay naa may pictures nga naay pagkaon sa fast food chain, naa po’y mga gamit napud nila didto unya naalarma gani ta kay murag kahon-kahon nga condoms nga pundo nga naa sab sa hotel rooms,” matud ni Resma.
“Sugod atong hugot mga kampanya didto sa mga ginagmay nga motels lugar, mga barato-barato siguro diri sila sa mga dagko kay dili lugar nato ma-operasyonan. Pero atong gusto ipahibalo sa tanan labaw na sa publiko nga rest assured nga sa atong pag-implementar sa bala-od patas gyud ni mapadako ug mapagamay,” dugang niini.
Gidugang pa niini nga usa usab sa ginatan-aw nga anggulo ang nadawatang taho nga dunay van ang maghatod sa mga menor de edad sa maong hotel ug sutaon ang posibilidad nga dunay dakong grupo ang naggunit niini.
“Maoy isa atong gatan-awon pud nga angle kung basin naay grupo o sindikato ani nga gahawid aning minors,” dugang niini.
Dako ang posibilidad nga biktima sa prostitusiyon ang maong mga menor de edad ug gidugang pa niini nga posibleng mapasara ilabi na nga dako kini nga kalapasan sigon na usab ni Atty. Edgardo “Egay” Uy.
“Ang pinakaduol ani prostitution gyud, ang amo lang medyo gikaguol kay dunay mga operator nga gahig ulo, kung ingon naa man kami sa RCB are thinking nga also hit the operator kay di man pwedi moingon ang operator nga wala kabalo, posible gyud na kani bug-at man kaayo ni,” matud ni Uy.
Sa pakighinabi usab kang Nida B. Paña, assistant department head sa CSWD, gibutyag niini nga angayang patubagon ang mga ginikanan sa mga biktima.
“Atong mga ginikanan ato pud patubagon parte ana nga mga cases, karon kay dili nato na e-promote, naa man gud ginikanan maoy rason nila nga ang mga bata maoy patrabahuon sa mga dirty works nga ingon ana para lang ma-sustain ang ilang panginahanglan sa pamilya,” matud ni Paña.
Kasamtangang anaa sa NBI ang maong mga giingong suspek apan wala pay gipagawas nga pahayag ang tinugyanan niini.