Roldan: Bakasyon alang sa mga bata

“Mas nindot nga maglikay sa disgrasya mintras wala pa nahitabo.”

HUMAN na ang eskuwela ug panahon na sa bakasyon. Makaginhawa na gayud kitang mga ginikanan sa nagpungasi nga bayrunon sa eskwela. Ipon-ipon na pod para sa sunod nga pag-abli sa klase.

Ang mga anak nangita na’g kabisihan aron dili maburyong sa balay. Ingon ang ubang ginikanan nga maayo na lang nga may gadget aron dili magsige’g suroy.

Ang uban nag-ingon nga di pod maayo kay kanunay lang magyampungad sa social media o sa TV. Di masugo kay dili mabiyaan ang ilang dula sa internet kay basin mapildi.

Nag-andam sab ang uban og outing karong bakasyon. Kasagaran moadto sa dagat ug sa bukid. Makawala daw kini sa stress ug kalaay.

Maayo ang parat nga tubig sa dagat sa pagwagtang sa toksin o dautang elemento sa panit ug pagpaayo sa sirkulasyon sa dugo.

Mokuha og basa nga pinong balas sa dagat dayon hinayhinay nga ikuskos sa tanang parte sa lawas.

Maayo sab kini nga pangwagtang sa kalyo sa tiil ug kubal sa kamot ug siko.

Mawala niini ang lagom sa kilikili, liog, lukon-lukon ug singit.

Kanunayon kining buhaton kung may okasyon nga makaadto sa dagat. Likayan lang ang hinubrang pagpainit ilabi na sa hapon kay puwede kining hinungdan sa skin cancer.

Kung di malikayan nga magpainit, magbutang og sunblock, magpayong, magkalo o magsul-ob og long sleeves.

Mas nindot nga maglikay sa disgrasya mintras wala pa nahitabo.

Busa nindot sab nga makahibalo ang mga bata sa paglangoy. May mga “swimming lessons” nga puwedeng mo-enrol ang atong mga anak.

Gawas sa dagat, maayo sab ang limpyo nga hangin sa bukid. Maayo sab ang bukid kay way saba ug lab-as ang makaon nga prutas ug lagutmon.

Tun-an ang mga bata sa kinabuhing banikanhon aron dili maignoy kung asa gikan ang pagkaon sa ilang talad kan-anan ug restawrant.

Panahon sab kini nga matun-an sa mga bata kung unsaon pagtanum kay mora’g wala nay panahon sa eskuwelahan nga maghimo og garden o magtanum sa palibot.

Ipakita sab sa kabataan ang nagkadaiyang hayop sa bukid ug kung unsa ang ilang papel sa bukid ug sa kalibutan.

Kung naa pay higayon, maayo nga makasakay sila og kabayo o kabaw, balsa o kariton samtang bata pa.

Dili kini nila makalimtan hangtud sa ilang pagkatigulang. Ipanghambog kini nila sa ilang mga klasmeyt ug kadula sa siyudad kay dili tanang bata makaadto sa bukid.

Gawas sa swimming lesson, ipaapil sab nato ang mga bata sa theater ug music workshops.

Related Stories

No stories found.
SunStar Publishing Inc.
www.sunstar.com.ph