TAGUM CITY -- Daw di mahulgan og dagom sa kadaghan sa mga tawo nga misuporta sa natigayong rally sa mga lokal nga kandidato sa PDP-Laban sa Davao del Norte sa Tagum City Hall Atrium, Biyernes, Marso 29.
Mga inilang politiko gikan sa Davao del Norte ug Compostela Valley ang anaa sa maong rally kinsa nagpakita sa ilang suporta sa mga kandidato ubos sa political party ni Pangulong Rodrigo Duterte sa panguna sa gubernatorial candidate nga si Edwin Hubahib ug first district congressman Pantaleon Alvarez.
Ang mga inilang politiko nga anaa sa maong tigum mao sila Compostela Valley Congressman Ruwel Peter Gonzaga ug ang former governor ug kasamtangan nga provincial board member Arthuro “Chongke” Uy ingon man sab si former Davao del Norte vice governor Baby Suaybaguio.
Nasayran nga ang nahisgutan nga mga politiko dako og pagsalig kang Hubahib diha sa panerbisyo niini bisan pa niadto nga di pa siya usa ka elected official.
Sa usa ka press conference, madasigon si Hubahib nga namulong alang sa kalamboan sa iyang probinsya, sa paghatag og trabaho ingon man ang pagtubag sa problema sa kapobrehon.
“Imbitahon nato ang mga investors nga mobutang sila sa ilang kompanya diri aron mokita ang probinsya at the same time mo kita sab ang katawhan kay aduna na silay panginabuhian,” ingon ni Hubahib.
Giklaro sab ni Hubahib ang isyu, “Sauna ila kung giingnan nga drug addict daw ko, ako silang giingnan nga magdungan mi og drug test, kanang taga PDEA ang magbuot kung kanus-a para maklaro gyud.”
Dugang niini, gipaklaro sab ni Hubahib ang isyu nga gitrapo kaniya gikan sa iyang kaatbang labot sa iyang wala suma pa pag-declare sa iyang income.
“Dili pa man ko empleyado sa gobyerno, ngano ing-ana man ilang ginasulti, basin sa sunod mo-ingon na pod na sila nga naa koy mga babaye,” pagpaklaro ni Hubahib.
Gani si Island Garden City of Samal (Igacos) Mayor Al David Uy, miyembro sa PDP-Laban mipakita sab sa iyang suporta kang Hubahib gumikan nakita niini nga mas molambo pa ang Samal.
“His promise to make health services for free in our hospital here, is a very big help to us,” ingon Mayor Uy.
Alang kang Alvarez, “I think it’s about time to give the leadership to the people who really have genuine service to the people of the province.” (Victor Manalo/PR)