WALA na ilha sa suspek ang iyang igsuon ug ang iyang suod nga higala diin iya kining gipamusil-patay Dominggo sa kaadlawon, Marso 31, sa Lower Pogpog, Barangay Sibulan, Sta. Cruz, Davao del Sur.
Ang Sta. Cruz Municipal Police Station nag-ila sa mga biktima nga sila Elmon Calugas, 31, security guard ug Mitchie Panerio, 28, minyo, mag-uuma, samtang ang suspek mao ang igsuon nga si Jaime Panerio, 33.
Sa inisyal nga imbestigasyon sa kapulisan, nasayran nga nag-inom ang tulo gawas sa balay ug dihang sa pagsulod sa suspek sa balay didto iyang naabtan ang iyang ex-girlfriend.
Sa kapungot niini, iyang gikulata ang iyang kanhi uyab ug diha dayon iyang gipamusil ang duha niya ka mga kauban sa inom gamit ang 357 revolver nga maoy hinungdan sa ilang kamatayon.
Gisaysay sa suspek nga gikabit sa iyang manghud ang iyang kanhi uyab nga gipamatud-an sa usa pa nila ka higala.
Daling nasikop ang suspek kinsa nagtingkagol karon sa prisohan sa Sta. Cruz MPS samtang ang patay’ng lawas sa duha gipahiluna na sa ilang mga pamilya.
Sa laing bahin, gipatay sab sa usa ka bana ang iyang misis human niini nasayran nga aduna kini alegasyong kabit.
Sud mismo sa ilang panimalay sa Belisario Village, Barangay San Antonio, Agdao District, Davao City gipatay si Merlyn (bansagon gitago), 47.
Sumala sa impormasyon nga nakalap sa SuperBalita Davao, wala na kaantus ang bana nga si Rogelio, 49, dihang iyang nasayran nga giingong dunay laing lalaki iyang misis.
Human sa hitabo ala 1 sa kaadlawon Lunes, misibat si Rogelio sakay sa motorsiklo kinsa nakita pa sa mga barangay tanud.
Ang silingan nga si Jean, nakamatngon nga nangayog tabang ang biktima, apan wala lamang niya kini panumbalinga sanglit away mag-asawa lamang.
Apan buntag sayo napalgan nalang nga nagbuy-od ug nagkadugo na kinsa wala nay kinabuhi ang biktima sud sa ilang balay.
Sa pagsubay sa Scene of the Crime Operatives (Soco), nasuta nga gipusposan og bangko nga kahoy tumong sa ulo ang biktima nga misangko sa iyang kamatayon.
Gipangita na sa kapulisan ang suspek samtang ang patay nga lawas sa biktima gipahiluna na sa iyang kabanay.