HUMAN sa grabing pahid og yellow batok sa BOPK dinhi sa Syudad sa Sugbo, nakalitan ang mga tigsuporta sa Team Barug diha sa social media dihang gianunsyo sa proclamation rally sa grupo nga kini mosuporta kang Bong Go.
Nahitabo man gud kini human giisa ni Presidente Rodrigo Duterte ang mga kamot ni Bise Mayor Edgar Labella ug kanhi mayor Mike Rama atol sa labing ulahing PDP-Laban rally dinhi sa Syudad sa Sugbo diin nag-abot ang liboang mga sakop sa PDP-Laban sa tibuok lalawigan diha sa Plaza Independencia.
Nasundan kini sa pag-isa ni Davao City Mayor Inday Sara Duterte-Carpio sa kamot ni Labella pagka human sa ilang programa diha sa IC3 Convention Center.
Nakahatag kinig ideya sa pipila nga mahimo nang ipahid sa BOPK ang yellow.
Busa dihang niari si kanhi presidente Noynoy Aquino, duna gyuy amigo nga nagsigig hisgot nga magpaisa ba sab og kamot si Mayor Tomas Osmena ug iyang mga kaubanan.
Gani, dihang wa moadto sila sa Mayor Osmeña, gihimo na sab nga ngil-ad siya kay bisan for old times sakes na lang unta. Sigi na lang kon yabag alang kanako ang ilang reasoning.
Mao nga ningsiga ang ilang mga mata dihang gianunsyo nga suportahan si Bong Go sa BOPK. Matod daw ni Mayor Tomas Osmeña, dugay na sila nga amigo ni Bong kaniadto pang mayor pa si Digong sa Davao.
Lahi ra gyud tingale ang karaang managhigala kay sa anang nagka-amigo lang tungod sa miaging eleksyon.
Syaro sab nga wala makabantay ang mga anti-Tommy trolls nga dihang nisang-at og mga certificate of nomination and acceptance (Cona) ang halos tanang sakop sa BOPK nga nagpasilong na sila karon sa LDP kun Lakas ng Demokratikong Pilipino?
Ang Cona sa usa sa importanteng sakop sa BOPK nga si Konsehal Dave Tumulak gikan sab sa Nacionalita Party.
Tungod niini, wala ko mahibulong nga mosuporta sila kang Sen. Sonny Angara ug Sen. Cynthia Villar.
Dayon, obvious na kaayo nga di nila kalimtan ang igsuon sa mayor nga si kanhi senador Serge Osmeña.
Dihang bag-o pa ang administrasyon ni Presidente Duterte, nakahibawo na man ang mga orihinal nga mga political operators sa administrasyon nga dunay laing Partido nga maoy kadangpan sa mga kandidatong di ma-accommodate sa PDP-Laban.
Tuod man, nitumaw ang Hugpong ng Pagbabago (HnP) nga gipangulohan ni Inday Sara.
Apan unsang pagka unsaa nga gimaniubra man ni Presidential Assistant Mike Dino nga usa ra ka lineup ang ma-isa sa PDP-Laban ug HnP sa mga kandidato sa lalawigan ug sa Syudad sa Sugbo bisan pa man og pwede ra gyud unta sila mopasilong sa HnP. Tungod sa kalaki ni Dino, nakakuha na hinuon og mga lider sa Sugbo ang front-runner sa lumba alang sa Senado karon nga si Sen. Grace Poe. (@anol_cebu sa Twitter)