MAKAPA-abot kita nga samtang magdagan ang kampaniya, magka-init usab kini. Mas init ang local election kay sa national elections gumikan kay ato man na-ilhan ang mga mikandidato ug gumikan usab kini sa ilang mga loyal nga supporters. Gani ang uban mosangpot naman sa mga bayolente ug mo-resulta gyud pinatyanay. Mao nay uso didto sa pipila ka suok-suok nga bahin sa Luzon ug ingon man sa Mindanao nga diin uso gihapon ang mga political warlords nga mogamit og 3Gs (gold, gun and goons).
Dinhi sa ato medyo professional man ang atong mga pulitiko. Kon mag-away man ang atong mga pulitiko, baba-ay lang nga pinaagi sa media o ba kaha kihaay ngadto sa korte o Ombudsman. Away binabaye ning ila. Apan didto sa mga gubot nga lugar, buka man sa armas ang patingugon didto.
Gipaabot nga medyo init ang panagtigi nila ni Mayor Tomas Osmena ug Vice Mayor Edgardo Labella sa pagka-mayor ning dakbayan sa Sugbo. Kana kon mosukol si Labella o mopahit pod batok ni Tomas. Daghan man god ang naka-komentaryo aning Labella nga sobra ra ka maayong tawo. Dili mobawos sa ataki ni Tomas. Mapahi-ubsanon. Mao usab ang posibleng mahitabo sa dakbayan sa Mandaue tali nila Mayor Luigi Quisumbing ug Kong. Jonas Cortes. Gani nagkihaay naman ang isig ka-kampo. Okey lang lagi na kay sa bayolente nga pamaagi.
Bisan tuod og puro mga babaye ang nanagan sa pagka-gobernador apan gipa-abot usab nga mamahinong init ang kampanya tali nila ni Vice Governor Agnes Magpale ug Cong. Gwen Garcia. Hinuon, morag imposible nga magka-personalay ang kampaniya ni Agnes ug Gwen. Gani ang kampaniya ni Gwen karon nag-sentro man ni Davide.
Kon aduna may negative issues batok ni Agnes nga gibatu si Gwen, igo man lang siyang napagan sa administrasyong Davide. Wala pa man mahimong gobernador si Agnes maong dili siya ma-sentro sa ataki kay wala may isyo nga nakita si Gwen. Wala may anomaliya si Agnes. Kon aduna may masupalpal o ma-momo mao si Davide dili si Magpale. (bobbygnalzaro@gmail.com)