Delicadeza sa mga politiko atol sa graduation

WAY balaod nga nagdili sa mga pulitiko o mga kandidato sa umaabot Mayo 13 nga eleksyon nga kuhaon isip mamumulong sa graduation rites.

Apan isip delicadeza, matod ni acting Cebu Provincial Election Supervisor Jerome Brillantes, nga mas maayo nga dili na motambong ang mga pulitiko o kandidato sa end-of-school-year (EOSY) rites.

“Actually, we have no basis nga mobawal sa mga pulitiko o sa mga DepEd (Department of Education) nga mo-invite og mga guest speaker nga mga kandidato, ang kuan lang namo ana is delicadeza,” pasabot niini dihang nahinabi sa mga tigbalita niadtong Lunes, Abril 1, 2019.

Sa mga publikong tunghaan, naandan na sa pipila ka mga opisyal nga nagdumala ang modapit og mga pulitiko aron mamumulong atubangan sa mga tinun-an ug ilang mga ginikanan sa mga graduation rite.

Apan ang DepEd nipagawas og Department Order No. 2 nga pinetsahan og Pebrero 18, 2019, nga nagsilbi nga guidelines sa pag-organisar og moving up ug graduations rites sa kindergarten hangtod sa Senior High karong tuiga.

Sa maong kamandoan, gidid-an ang mga pulitiko nga mangampanya sa mga EOSY gikan sa Abril 1 hangtod sa Abril 5.

Ang mga publikong eskwelahan gipahinumdoman sa kamandoan nga likayan ang pagdapit og national ug lokal nga mga kandidato ug political parties sa isig graduation ceremonies aron malikayan ang pamulitika ug mapanalipdan ang mga opisyal sa DepEd, labi na panahon karon sa pagpangampanya, na dli magamit sa mga politiko. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph