SUPERBALITA DAVAO

Dura: Impartial

Ratsada

NIADTONG miaging semana, pipila sa among mga nahisgutan kauban ang mga student interns gikan sa mga inilang tunghaan sa Davao City ang politika sa nasud.

Sa among diskusyon, miabot sa punto nga gipangutana ako nila nganong di sila makakita sa akong post sa Facebook nga nagpabor sa usa ka politiko.

Sanglit gipangutana ako, ako sab silang gitubag nga: “Ma’am ug Sir, ako kining gihimo tungod kay naningkamot ako sa kaugalingon nga magpabilin nga impartial.”

Ug aron masabtan nila ang akong punto, akong gipasabot kanila ang papel sa media sa atong katilingban diin kinahanglan nga kanunay patas sa pagpresenta sa isyu sa radyo, mantalaan, telebisyon, ug sa social media.

Among nahisgutan ang katungod sa pagpamahayag subay sa batakang balaod, apan akong gipasabot kanila nga kining maong katungod duna say limitasyon aron di makayatak sa katungod sa uban.

Nalakbitan sab namo ang kasong libel nga mahimong ipasaka kanako kung ugaling di ako patas sa paghisgut sa isyu nga naglambigit sa usa ka politiko.

Ako sab gipaambit kanila nga mahimo akong ikiha og cyberlibel ug cyber-bullying kung masuta nga ang akong mga gipaskin sa Facebook dunay malisyusong tinguha nga dauton ang usa ka tawo.

Gawas niini, ugaling magpaskin ako og hulagway ug pipila ka mga datus sa tawo sa social media mahimo akong ikiha sa pagpalapas sa Data Privacy Act.

Ako sab gipasabot kanila nga bisan akawntabol ang politiko sa mga tawo, duna sab silay katungod nga motubag sa mga isyu mao nga kinahanglang patas ako sa paghisgut niini sa mass media ug social media aron matuman ang gilatid sa Broadcast Code of the Philippines 2007 nga giamendahan niadtong 2011 lakip na ang Journalist’s Code of Ethics nga nakat-unan nako sa seminar namo sa Philippine Press Institute (PPI).

Pipila kanila nangutana sab sila nganong kritikal ang media sa gobyerno? Ug ako sab sila gitubag nga: “Kini tungod kay among gihimo ang trabaho subay sa journalistic function sa mga sakop sa media.”

Unsa man kining journalistic function? Kini mao ang: 1) interpretive function diin ang media mag-analisa ug hatag interpretasyon sa mga problema; 2) adversarial function diin ang media magmaduha-duhaon sa mga lakang sa gobyerno, mangutana kung kini tinuod ba ug walay nalapas nga mga balaod; 3) disseminator function diin isabwag sa media ang mga maayo ug kahiwian sa gobyerno; 4) populist mobilize function diin ang media mopadayag gayud sa opinyon sa publiko labot sa maong isyu.

Gawas niini, dunay say ethical function ang sakop sa media sama sa: 1) truth telling nga nagpasabot nga bugtong kamatuoran lamang ang isulti; 2) minimizing harm nga nagpasabot nga kanunay magbantay ug morespeto ang media sa katungod sa ubang tawo nga nalambigit sa isyu; 3) independence nga nagpasabot nga walay lain nga interes ang dapigan kundi ang katungod sa publiko nga masayud; ug 4) accountability nga nagpasabot nga modawat ang media sa kritisismo ug dunggon ang reklamo sa publilko batok kanamo nga mga media.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph