BISAN og giingong nasayod na siya nga gidili ang pagbaligya og mga endangered species nga matang sa mananap, kampanti gihapon kining usa ka lalaki nga mibaligya og mga gagmay nga buaya ug mga itlog niini ngadto sa operatiba sa National Bureau of Investigation (NBI)-Davao.
Balhog karon sa selda sa NBI-Davao ang suspek nga si Mark Lester Bringas, 30, residente sa Kapalong, Davao Del Norte.
Nasayran nga nadakpan ang suspek atol sa entrapment operation diin buot ibaligya sa suspek ngadto sa asset sa NBI ang lima ka itlog sa buaya, ug upat ka gagmay nga buaya sa kantidad nga P95,000.
Dihang gitunol ug gidawat sa suspek ang kwarta, gilayon nga giposasan ang suspek.
Sa bahin sa suspek, iyang nahimo ang sa ingon gumikan sa kawad-on.
Sumala sa otoridad nga di kini ang unang higayon nga gihimo sa suspek, butang nga gisubay na karon sa NBI-Davao ang iyang mga parokyano.
Kung masuta sa NBI-Davao nga gawas sa suspek duna pa kini mga kaubanan nga mo-deliver niini sa dakbayan, mohimo na sab og operasyon ang otoridad.
Sa kasamtangan, giandam na sa otoridad ang posible nga kaso nga ipasaka batok sa suspek didto sa korte. (Richy F. Nalagon)