SULOD sa ayroplano nga hapit na motugpa sa tugpahanan sa Manila may pahimangno si Rose sa iyang anak nga si Vincent, panganay sa tulo ka managsuon. Alas nuybe sa buntag milupad ang ayroplano gikan sa Mactan. Nakapasar sa ‘bar exam’ si Vincent. Karong adlawa, sa alas nuybe sa hapon, himuon ang ‘oath taking’ aron mahingpit na siyang abogado. Kon di pa tungod ni Vincent di makasakay og ayroplano ang iyang Mama ug Papa.
Natung-an og lingkod si Vincent sa iyang ginikanan. Sa iyang wala diha si Mama Rose niya; sa tuo, si Papa Fred niya. Seat number 16A, 16B, 16C ang ilang gilingkuran.
“Nagteks nako nga motambong sa oath taking ang imong tulo ka uyoan, mga ig-agaw ni Papa nimo. Mosugat sila nato sa airport. Mapasigarbuhon sila nimo,” ni Rose.
“Karon na lang?” ni Vincent nga naisa ang kilay. Wa lang magtingog si Fred kay diha sab sa iyang hunahuna nga mas maayo unta nga di na lang motambong ang iyang mga ig-agaw. Wa sab siya ganahi nila.
Sa wa pa mokuhag abogasiya si Vincent nakahuman na siyag B.S. Political Science. Cum laude siya pag-gradweyt. Sa ilang kalisod kadaghan sila nangayog pabor sa mga ig-agaw ni Fred nga tubig-tubigan sa Manila. Apan kanunay silang gibalibaran, labi na sa paghuwam og kuwarta panahon sa tingpalit og libro ug tingbayad sa twisyon. Nagkapangka-pangka gyud sila sa tulo ka anak nga nagtungha sa kolehiyo. Ordinaryo ra nga mga empleyado sila si Fred ug Rose. Si Fred sekyu sa usa ka Mall. Si Rose sekretarya sa usa ka abogado nga nihit og mga kliyente.
“Ayuha lang sila pagtagad. Pangamen nila. Isipa silang mga higala,” ni Rose.
Miping-it si Vincent. Milingi sa iyang Papa.
“Sa estorya pa, failure is an orphan. Kon nahagbong pa ka, wa gyud kay paryente. Success has many parents, sponsors, relatives, and friends,” ni Fred.
“Plastikan lang god,” ni Rose.
“Sakto, plastikan,” ni Fred nga mipahiyom.
“This is your happiest moment. Do not allow any person or thing ruin your happiness,” ni Rose.
“Okey ra, Ma, Pa. wa koy panahon sa kaligutgot. Grasya sa Diyos ang akong pagpasar sa ‘bar’. Kon unsa may ilang ‘misgivings’, I totally forgive them and forget!” ni Vincent.
“Salamat, anak!” ni Rose nga migakos kang Vincent.
“Sa imong gisulti karon, misamot akong kamapagarbuhon nimo,” ni Fred nga mipikpik sa abaga sa anak.
Ug nadungog nila ang anunsiyo gikan sa piloto nga puwede na ablihan ang pultahan sa ayroplano. Wa sila makamatikod sa pagtugkad niini sa tugpahanan. (KATAPUSAN)