ADUNAY posibilidad nga moduwa sa Team USA si Los Angeles Lakers forward LeBron James alang sa 2020 Tokyo Olympic Games apan gitataw sa four-time MVP nga dili siya moduwa sa FIBA Basketball World Cup nga ipahigayon karong Agusto sa China.
Nagkanayon ang 34 anyos nga superstar nga sa off season sa National Basketball Association (NBA), sugdan na niya ang produksyon sa salidang “Space Jam 2” hinungdang di kini moduwa sa World Cup.
Hinuon gipasabot ni James nga posibleng moduwa siya sa 2020 Olympics.
Unang niduwa si James sa Team USA alang sa Olympics niadtong 2004 sa Athens diin wala damhang igo ra naangkon sa mga magduduwa sa NBA ang bronze medal.
Niadtong higayuna, ang labing sinaligan sa Team USA mao sila si Allen Iverson, Dwyane Wade, ug Tim Duncan.
Human niini, si James na nahimong labing sinaligan sa Team USA nga ningdaog og gold medals sa 2008 Beijing Olympics ug 2012 London Olympics.
Wala moduwa si James sa Team USA nga nakalangkat sa ikatulo niining sagunson nga gold medal sa Olympics niadtong 2016 sa Rio. (AFP, ESL)