HUMAN sa iyang gipasiugdahan nga online poll, daw aduna na’y napilian si World Boxing Association (WBA) welterweight “regular” champion Manny Pacquiao kon kinsa ang iyang sunod nga kontrahon.
Matod sa The Ring Magazine nga hapit nang magkasinabot sila si Pacquiao ug American Keith Thurman, kinsa maoy tag-iya sa WBA welterweight “super” title.
Ang fighting senator sa Pilipinas nagtinguhang moaway og balik karong Hulyo gumikan kay ning panahuna wala siya’y trabaho sa senado.
Wala pa man tuod klarong detalye ang panagharong nila ni Pacquiao ug Thurman apan labing seguro, ipasalida kini sa Showtime sa pay-per-view (PPV).
Sa taho sa Forbes.com, nalantawan nga delikado si Pacquiao kon madayon ang pagpakigbatok niini kang Thurman, kinsa mas dako, abtik ug mobuhi sab og makusog nga kumbinasyon sa mga kumo.
Si Thurman naggunit og 29-0, 22 KOs nga rekord samtang si Pacquiao adunay 61-7-2, 39 KOs nga baraha.
Gawas pa sab, ang Pambansang Kamao ng Pilipinas nag-edad na og 40 anyos samtang si Thurman nag-edad pa lang og 30.
Hinuon basi sa gipakita ni Pacquiao sa iyang pagdominar kang Eroll Spence sa labing ulahi niyang away, tatawng aduna pa’y saktong ikabuga ang 8-division world champion.
Sa laing bahin, gigamit ni Floyd Mayweather Jr. ang social media aron ipadayag nga wala’y kamaturoan nga dako ang posibilidad nga madayon ang ilang rematch ni Pacquiao.
Ning bag-uhay lang, ang amahan mismo ni Mayweather ang nipabuhagay nga mobalik og away ang iyang anak karong tuiga ug dako ang posibilidad nga si Pacquiao maoy kontra.
Apan hugtanon kining gipanghimakak ni Mayweather.
“Rumors, rumors, rumors! Mayweather-Pacquiao part 2 is not true. If you didn’t hear it on FightHype first, then it’s not true,” matod ni Mayweather sa interbyu sa FightHype.com. (ESL)