SA WA pa magsugod ang campaign period sa lokal nga mga kandidato dugay nang mibukal ang kaldero sa pulitika.
Ang init nga tinubagay mabasa sa social media, ilabi na sa Facebook nga maoy numero unong gigamit nga instrumento sa mga propaganda sa matag kandidato.
Ang lapok nga gilabay ngadto sa kandidato gibalik sab ug labay aron depensahan ang gilabanan nga pulitiko.
Ang nahitabo pulos nahugawan ang matag kandidato. Hinuon basta mosud ka sa kinabuhi sa pulitika dali ra kaayo mahimugso ang isyu.
Tungod niini, daghan ang wa mainteres sa pag apil-apil sa kinabuhi sa pulitika kay di gusto og samok ug di gustog problema.
Tungod niini atong ihatag ang pagsaludo ngadto sa mga nahimong pulitiko kay mitabang ug mitubag sa problema sa ubang tawo.
Karon gikiha ni Kongresista Gwen Garcia, sila si Gobernador Junjun Davide, ug
Bise Gobernador Agnes Magpale tungod sa gikatakdang pagbarug sa 20-story resource center sa Kapitolyo.
Matod pa ni Garcia, wa kinahanglana ang building kay aduna pay mga nag- unang panginahanglan nga gamitan sa kuwarta para sa katawhan.
Nganong gipabarug ni Garcia ang kontrobersyal nga Cebu International Convention Center (CICC) sa dihang siya pa ang gobernador?
Ug karon sa panahon ni Davide dili pwede ug kon natayming pa nga ikaw ang gobernador ipabarug ang edipisyu?
Kay kon si Gwen pa karon ang gobernador way problema ang pagbarug sa 20-story building sud sa Capitol compound?
Daghan ang nakabantay ug nangutana nga ang hinungdan sa pagsaway ni Garcia, ug pagkiha kaniya ngadto nila ni Davide ug Magpale tungod sa pulitika ug panimawos?
Panimawos! Kay sa wa pa si Gwen mobiya sa Kapitolyo nasuspenso kini tungod sa mga kaso nga iyang giatubang.
Mao daghan ang nagtuo nga ang gihimo ni Gwen usa ka panimawos aron masuspenso sila si Davide ug Magpale sama sa nahitabong pagka suspenso ni Garcia kaniadto. Email: efrenlonzon71@gmail.com Text: 09235562777