DI NA kini bag-ong balita. Sa 19 77, ang Dept. of Public Works and Highways (DPWH) natugsaw sa nagbukal nga tubig sa kauwawan sa kaso nga pangurakot.
Nagkatay ang mga ghost project sa mga dalan sa habagatan ug amihanang bahin sa Sugbo. Ang report nga nahuman ang highway sa habagatan ug amihanan dakong bakak human masusi sa NBI.
Daghan ang gipangtaral sa hukmanan. Apil gani ang mga kontraktor ug mga COA auditor. Ang Accountant sa DPWH maoy utok sa maong kahiwian nabilanggo uban sa ubang mga opisyal.
Tungod kay konektado sa maong pangurakot daghan ang gipanangtang nga gagmayng mga kawani. Ang uban nga may mga banggiitang manlalaban nakaipsot.
Apan wa managam ang taga DPWH hinunoa misamot hinuon ang pangurakot. Nahimo nang kultura ang pangumisyon sa mga proyekto sa imprastraktura.
Sa pangurakot diha sa DPWH daghan sa mga kawani nahimong silent millionare. Daghan sad sa mga magbabalaod nga kasangkot nila dihang diha pa ang pork barrel.
Way giliatan sa mga dalan ug taytayan nga gipangtukod naa gayud ang komisyon nga matod pa 20% ngadto sa 40% sa magasto sa proyekto.
Busa kining Build Build Build nga programa sa kagamhanan nagpasabot og kapistahan sa pangurakot sa mga kawani sa DPWH nga makabusdik sa mga bulsa sa mga kawani.
Nagsunod ang mga ahensiya nga labing kurakot sama sa DENR. Gikan dinhi ang pangurakot sa mga planta sa semento. Mga piggery ug poultry. Mga gam-anan nga tinubdan sa pulyusyon.
Ang Finance Dept. nga naa ang Customs ug BIR. Giulod na kuno ning mga ahensiyaha sa pangurakot. Ang DOTC diin naa ang LTO ug LTFRB. Ang pagkuhag driver’s license ug prangkisa naa ang pangurakot.
Ang Government Corporations diin puno sad sa pangurakot labi na kadtong nagplantalya lag mga livelihood program sa kagamhanan.
Kining tanan suma sa mga reklamo sa pangurakot, panguwarta ug panikas sa salapi sa kagamhanan nga gibulgar sa Presidential Anti-Corruption Commission (PACC).