ORMOC City, Leyte -- Lider sa New People’s Army (NPA) ni-surrender sa kasundalohan sa 802nd Infantry Brigade sa Ormoc City, Biyernes, Marso 29.
Si Liberado Tarong Bungato o mas naila nga Tarong, Tiyong ug Biyong, 59, niatubang kang Army Brigadier General Lope Dagoy.
Nahitabo ang pag surrender atol sa gipahigayon nga brigade operation sa Barangay Anislagan, Calubian, Leyte.
Gi-surrender usab ni Liberado ang iyang kalibre .45 nga pistola ug mga bala ug mga dokumento nga gikonsiderar sa militar nga dunay high intelligence value.
Duna usay upat ka M16 Armalite rifle ug gatusan ka mga bala niini ang gi-surrender ni Liberado. Giapil niya pagtahan ang duha ka improvised explosive device (IED).
Matod ni Army Captain Salve Evangelista, civil military operations officer sa 802nd Brigade, wa hinuon mo sulti si Liberado diin ug kinsa ang nag- supply kanila sa mga armas ug bala.
Matod sa 802nd Brigade, executive committee member sa section committee Leyte ug commanding officer sa Apoy Platoon si Liberado.
Gibutyag ni Liberado sa militar nga nakadesisyon siya sa pag surrender gumikan sa di maayong liderato sa ilang grupo ug ang padayon nga military operations.
Matod ni Dagoy, way angay kahadlokan ang mga NPA nga buot mobalik sa gobyerno kay siguruon nila nga luwas kini ug mabalik sa normal ang pagpuyo.
“The Army is sincere in its offer of peace. We will ensure the personal safety of those who will choose to lay down their arms and peacefully return to their families. We will ensure your safety and well-being when you lay down your arms and live peacefully with your families,” matod ni Dagoy.
Giproseso na karon ang mga dokumento aron malakip si Liberado sa mga kanhi NPA nga nakadawat og tabang sa Enhanced Comprehensive Local Integration Program (E-clip).