KARONG Abril 15 na ang deadline sa pag-file og income tax alang sa mga indibidwal ug sa mga korporasyon.
Tungod niini miawhag ang Bureau of Internal Revenue - Revenue Region 13 nga mo-file ang hingtungdan sa dili pa ang deadline.
Kini aron dili sila makasugat og dakong penalty kon ugaling molapas na sa gitakdang petsa ang ilang pag-file.
Matod sa tigpamaba sa BIR RR 13, Queenie Luz Auditor, nga aduna na’y available nga forms online ang ilang buhatan ug gani aduna usay available nga payment channels sama sa Landbank of the Philippines, Development Bank of the Philippines ug GCash nga mamahimong gamiton alang sa pagbayad sa ilang responsabilidad.
Gibutyag ni Rainier Joseph Viacrusis, ang revenue office examiner sa Revenue District 80 sa siyudad sa Mandaue, nga ang mga maulahi sa pag-file niini mamahimong mapatongan na og tulo ka charges bisan pa og usa ka adlaw lang nga mauwahi ang ilang pagsumiter.
Naglakip sa maong multa mao ang surcharge nga 25% sa tax due, 12% interest per annum, ug ang compromise penalty nga mag-depende sa tax due sa tax payer.
“First and foremost, dili ta mag-encourage anang late payments. One day late is still late. Once nga ma-late na ka bisan og one day, mogawas na gyud na ang tulo ka charges. Dili na siya multiple choice. All of the above gyud na nga iimplement,” matod ni Viacrusis.
Dugang ni Viacrusis nga aron pud makalikay sa posibleng pag-ungot sa system tungod sa kadaghan nga mo-file, magsayo na lang gyud sa pag-file alang sa ilang mga bayronon. (HBL)