NAGPAUWAN og tulo ka sunodsunod nga three-point shots si Wilkins Sanchez sa hinapos nga bahin aron aswaton ang Bibbo Hotdog/Cebu Institute of Technology (CIT) Wild Kittens ngadto sa kadaugan batok sa Ave Maria Sanctuary Park/University of San Jose Recoletos (USJ-R) Baby Jaguars, 84-83, kagahapon sa Cesafi-sanctioned 2010 Partner’s Cup juniors division sa Cebu Coliseum.
Ang Wild Kittens, nga ningposte sa ilang ikatulong sunodsunod nga kadaugan ug nisaka sa 3-2 nga baraha, kanunay gyud untang naggukod sa duwa, gani nalubong sila human sa 1st quarter.
Sa pagpangulo ni Sanchez inabagan nila ni Cesafi high school MVP Mark Jayven Tallo ug Joseph Nalos, ang Wild Kittens nagsugod og bangon sa 3rd quarter hangtod nga nakasikit gyud sila pagbalik.
Ang Baby Jaguars, nga natagak sa 2-2 nga baraha, aduna pa unta’y igong kahigayunan nga ibali ang resulta apan pakyas sila pagdugang og puntos hangtod na nga napupos ang oras.
Sa laing duwa, gipanglampornas sa PTT Fuels/University of the Visayas (UV) Baby Green Lancers ang Lion Tiger Aerosol/University of Southern Philippines Foundation (USPF) Baby Panthers, 86-66.
Ang Baby Green Lancers niabante sa 3-2 nga baraha samtang ang Baby Panthers natagak sa 1-3 nga record.
r