PASADO si pound-for-pound Manny Pacquiao sa tanang pre-fight medical examinations kagahapon sa San Pedro Medical Center sa San Pedro, California, USA apan naobserbahan nga nangurog gyud siya sa blood testing.

Mismong ang bantugang sportscaster nga si Chino Trinidad ang nakabantay nga nangurog ang Pambansang Kamao sa Pilipinas dihang gikuhaan na kini’g dugo.

For updates from around the country, follow Sun.Star on Twitter

“Mahirap kapag ikaw ay kinunan ng dugo, lalo na sa aming mga atleta. Ang kailangan namin ay lakas so pag kinunan ng dugo, manghihina ka. Makaka-recover ka lang mga three or four days pa (after),” matod ni Pacquiao sa interbyu ni Trinidad.

Ang pagkuha og dugo – nga apil gyud sa gikinahanglan sa matag away sa Amerika -- maoy modeterminar kon naggamit ba ang Performance Enhancing Drugs (PEDs) ang usa ka boksidor.

Kini maoy numero unong hinungdan nga napalpak ang negusasyon sa away unta nila ni Pacquiao ug Floyd Mayweather Jr.

Gusto sa kampo ni Mayweather Jr. nga ipahigayon ang blood testing pipila lang ka mga adlaw sa dili pa ang away apan ang gusto sa kampo ni Pacquiao nga 24 ka mga adlaw sa dili pa ang away hinungdan nga wala gyud nagkasabot ang duha.

Tungod niini, lainlaing dalan ang subayon sa duha diin makigharong si Pacquiao kang Joshua Clottey karong Marso 13 sa Dallas Cowboys Stadium samtang si Mayweather makigbatok kang Sugar Shane Mosley karong Mayo.

Alang sa away ni Clottey, nagkanayon si Pacquiao nga aduna pa siya’y igong panahon aron maka-recover human siya gikuhaan og dugo.

“OK naman yan (blood tests) 24 days before the fight. Makaka-recover pa tayo,” pasabot ni Pacquiao.