NI-AMBAK sa Marcos bridge ang usa ka wala maila nga lalaki sa wala pa masuta nga rason niadtong alas 8 Martes sa gabii, Abril 2, sa siyudad sa Cagayan de Oro.
Ang maong lalaki nga ni-ambak sa tulay anaa sa pangidaron nga 20 ngadto na sa 25 anyos ug usa ka lalaki.
Gikompirma usab sa Urban Search and Rescue pinaagi ni Nick Jabagat nga nakadawat sila og tawag Martes sa gabii sa giingong niambak nga lalaki ug wala kini napalgan.
Giingong nangayo pa kini og tabang apan pag-abot sa may tulay sa unahan nga bahin ni-uplok ug nahanaw ug padayon pa nga gipangita.
Samtang Miyerkules sa buntag, Abril 3, dunay patay nga lawas nga napalgan nga naglutaw sa suba sa tunga-tunga nga bahin ug gidala sa mga mananagat sa daplin sa may bukana sa Barangay Bonbon.
Wala pa usab kini identipikasiyon diin dunay deskripsiyon nga itumon, tambukon ug gibana-banang anaa sa gitas-on nga 5’4 ug gituohan kini nga mao kini ang niambak sa tulay.
Dili pa usab kini makompirma nga mao kini ang ni-ambak sa tulay gumikan kay wala may nakaila niini sa pagsulat niini nga balita.
Ang maong patay nga lawas ang kasamtangang gidala na sa punerarya.