TOURIST police sa Mandaue City Police Office (MCPO) ipa-reactivate human nakita nga gikinahanglan ang pagpahimutang sa mga pulis sa mga laaganan sa mga turista sa siyudad.
Samtang, ang tagdumala sa mga resort sa dakbayan sa Lapu-lapu giawhag sa Lapu-lapu City Police Office (LLCPO) nga mobutang og baywatch tower.
Duha ka teams kun dul-an sa 20 ka nga pulis sa MCPO ang gitinguha sa ilang direktor nga mapaubos sa seminar ug training alang sa pagka tourist police.
Giangkon ni Police Colonel Julian Entoma, direktor sa MCPO, nga sa Hulyo sa niagi nga tuig sa iyang paglingkud isip city director, nabungkag na ang tourist police sa MCPO human nga ang uban kanila ang nabalhin sa laing syudad ug lungsod.
Nakita ni Entoma ug bisan na sa pangulo sa Police Regional Office (PRO) 7 ang kamahinungdanon nga adunay pulis nga mag-uniporme isip tourist police, diha sa mga lugar nga dagsaan sa lokal ug langyaw nga turista ilabi na sa may North Reclamation Area.
Usa kini sa ilang pamaagi alang sa pagpatuman sa Ligtas Summer Vacation o Sumvac nga programa.
Samtang, ang kapulisan sa dakbayan sa Lapu-lapu ang mopahimutang pa og dugang collapsible outpost diha sa mga nagkadaiyang lugar, isip dugang sa ilang police visibility.
Gawas sa binuwan nga pagpakigtagbo sa mga security head sa mga hotel ug resort sa Lapu-lapu City, matod ni Colonel Limuel Obon, direktor sa LLCPO nga laing tigum ang ilang himuon agig pagpahinumdom, ilabi na sa napanglantawan sa mas pagdagsa pa sa daghan nga mga turista, ning bakasyon.
Ila giawhag ang resorts sa pagbutang og baywatch tower.
Ang mayor sa Lapu-lapu, Paz Radaza, nipasusi sa mga lugar nga ngitngit sa kagabhion, ilabi na ang mga sudlunon nga dapit, aron mapabutangan og suga.
Nakig-alayon usab ang Siyudad sa mga barangay opisyal kalabot sa pagmuntar og dugang mga CCTV camera.
Giangkon sa duha ka mga direktor sa MCPO ug LLCPO nga ning buwana hangtod sa sunod buwan, mas alerto ug wa sa ilang mga pulis ang gitugutan nga maka-vacation leave tungod sa sunodsunod nga dagko nga kalihukan.
Alang na sa Semana Santa, sa National Youth Day, Kadaugan sa Mactan hangtud na sa eleksiyon sa mayo 13.