DEAR Noy Kulas,
Maayong adlaw kanimo. Naaghat ko sa pagpadala sa pamasin imong mahatagan og kasulbaran kining akong problema. Ako si Henny, 35 ang edad, minyo apan buwag sa bana, lumad nga taga Mindanao pero nia sa Cebu nagtrabaho sa usa ka mall.
Ang akong prolema kabahin sa akong sitwasyon. Bisan buwag na mi sa akong bana kay naa na siyay lain ug naa nay anak, maayo ra ang among relasyon kay wa niya undangi og support ang among anak nga akong gibilin sa amoa sa Mindanao. Wa niya pasagdahi ang among anak kay pinangga gihapon kaayo niya. Ako na sab nga nadawat nga wa na mi.
Pero nagkaproblema ko karon kay niari siya sa Cebu kay naa na-assign diri. Karon, nagkita mi ug nanghangyo nga magbalik mi. Iya kong gisultihan nga mag-abang mi og kwarto pero di namo isaba sa iyang kapuyo karon. Mahug nga tago-tago ang among buhaton. Gimingaw na kuno siya nako ug nangayo og pasaylo sa iyang gibuhat.
Maayo kaha, Noy, nga ako ra siyang paundayunan sa iyang gusto? Di ba bati paminawon nga magbalik tuod mi pero magtago-tago ra mi? Asawa baya ko, di ba? I am the legal wife. Please tambagi ko, Noy Kulas. Daghang salamat.
HENNY
Hen,
Daghang salamat sa suwat. Bitaw, insulto kaayo na nimo nga ikaw nga legal wife iyang ipatago nga nagbalik mo. Unya public ang kabit. Kabit man gyud na ang term nga correct anang iyang kapuyo kay bisan bali-balihon, minyo man mo. Mahimo gani nga imo na silang ipapriso kon wa pa molapas og pito ka tuig ang ilang pag live in.
Nakadayeg ko sa imong pagpasaylo dayon niya for the sake tingali sa inyong anak nga iya gihapon nga pinangga. Wa may dautan niana. Apan ang pag-uyon sa iyang gusto nga mahitabo sagpa na sab kaayo na nimo. Maora kag asawa nga niuyon na lang nga adto na magyampungad sa kabit ang iyang bana. Unya ang bana gustong makig-sex sa iyaha kay magtiayon kuno sila. Nakaamgo ba kaha ang asawa nga insulto kaayo ni niya. Mahadlok pa ang bana nga makit-an sila sa iyang asawa. Bale, di ba?
Ayaw pag-uyon. Be friends but don’t let him abuse sa imong kaayo.
Kon gusto man siyang mobalik nimo, ayaw ipa-treat ang imong kaugalingon nga ikaw na ang kabit.
NOY KULAS