NAKAANGKON og tipik sa kasaysayan si Russell Westbrook sa iyang pagmugna og talagsaong triple-double nga nag-agak sa host Oklahoma City Thunder ngadto sa 119-103 nga kadaugan batok sa Los Angeles Lakers kagahapon sa National Basketball Association (NBA).
Si Westbrook nagpakatap og 20 ka puntos, 20 ka rebounds ug 21 ka assists aron maugbok sa kasaysayan isip ikaduha pa lang nga magduduwa nga nakarehistro og tag 20 o labaw pa ning tulo ka mga departamento.
Ang laing nakahimo niini mao si basketball legend Wilt Chamberlain, kinsa nimugna og 22 puntos, 25 rebounds ug 21 ka assists niadtong 1968.
“I tried to attack the paint,” matod ni Westbrook. “A lot of teams for me load the paint and stop me from getting to the paint, so I tried to use that to my advantage, drawing three or four people and finding open guys. I tried to set the tone early.”
Kadto maoy ika-31 nga triple-double nga nahimo ni Westbrook sa karon nga season.
Sa maong panag-engkuwentro, wa makaduwa ang power-forward sa Lakers nga si Kyle Kuzma sa ikaduhang higayon tungod sa injury sa tiil. Nahidugang siya nila nila ni LeBron James, Lonzo Ball, Brandon Ingram, Josh Hart ug Tyson Chandler.
Sa laing bahin, gipangmakmak sa host Golden State Warriors ang Denver Nuggets, 116-99, sa kombati sa mga lider sa Western Conference.
Ang Warriors, nga maoy back-to-back defending champions, ningpahugot sa ilang paggunit sa liderato sa Western Conference dala ang 53-24 nga rekord samtang ang Nuggets ningpilit sa ikaduhang luna nga adunay 51-26 nga baraha.
Sa pagsugod sa kombati, gamangtas dayon si Kevin Durant sa bisan asa nga departamento apan napakgang lang ang iyang dominasyon human siya na-ejected sa sayong bahin pa lang sa 3rd quarter.
Bisan nalimitahan ang oras sa iyang pagduwa, si Durant nakahipos lang gihapon og 21 ka puntos ug unom ka assists.
Ang Warriors gipangulohan ni DeMarcus Cousins pinaagi sa iyang 28 puntos ug 12 rebounds, nidugang og 17 puntos ang kanhi two-time MVP Stephen Curry samtang niamot og 13 puntos si Klay Thompson.
Pito ka mga magduduwa sa Nuggets ang nakamugna og dobleng numero nga puntos pinangulohan ni Jamal Murray, kinsa nimugna og 17 puntos.
Si Durant na-ejected sa nahabiling 8:21 minutos sa 3rd quarter gumikan sa iyang grabeng pagreklamo batok sa usa sa mga referee nga si Zach Zarba.
Niining gutloa, miitsa si Durant sa three-point land ug alang kaniya, gi-foul siya ni Millsap hinungdan nga hangin ra’y naigo sa bola apan wala’y gitawag nga foul si Zarba hinungdan nga miulbo ang kapungot sa two-time Finals MVP ug natawagan kini’g duha ka sunodsunod nga technicals fouls. (AP, ESL)