HALOS tanang kandidato moduol gyud og mga religious leaders aron pangayoan sa ilang suporta. Samtang ang uban dili mosupak sa baru-ganan sa simbahan sama niining Reproductive Health Bill aron dili kontrahan. Apan ang pangutana kon aduna ba gyuy solidong buto kining mga relihiyon?
Maka-impluwensiya kaha ang mga lider ngadto sa ilang mga sumosunod nga butaran ang usa ka kandidato nga ilang gi-endorso?
Sa habig sa Simbahang Katoliko maka-ingon ko nga walay solidong boto ang Katoliko. Kay ang mga lider sa Katoliko wala man mamulitika. Ilang gisunod ang probisyon sa Konstitusyon nga ‘separation of the State and the Church. Dili mo-endorso ang mga lider sa Katoliko. Igo lang silang mohatag og guidelines sa mga botante kon si kinsa ang angayang botohan. Ang ilang guidelines pinasubay sa mga pagtulun-an sa simbahan labi na sa natad sa moralidad. Hinuon, dunay gibarugan nga mga isyo ang Simbahang Katoliko.
IGLESIA NI KRISTO
Sa tanang relihiyon, ang Iglesia Ni Cristo ang nabaniog nga maoy mo-endorso ug mosuporta og kandidato. Mao nga kanunay nga mangulitawo ang mga kandidato sa mga INC leaders. Pero ambot lang kaha kon wala ba gayoy mosukwahi sa ilang mga sakop inig botar na panahon sa eleksiyon. Dili naman makita ang balota sa ilang mga lider. Konsensiya lang siguro.
Ang El Shaddai nga usa ka affiliated sa Katoliko minilyon ang miyembro. Mao nga pangulitawhan pod ang lider niini nga si Brod. Mike Velarde. Mao gihapon si Pastor Apolo Quiboloy sa Kingdom of Jesus Christ, nga adunay 6 milyones ka mga sakop, gipanglitawhan usab. Puwerting datua naman diay kini si Pastor Quiboloy no? Aduna nay TV and radio network og dako kaayo ang iyang gingharian didto sa Davao. Pero mao lagi gihapon ang pangutana kon maka-inpluwensiya ba si Quiboloy sa iyang mga sakop? Si Brod. Eddie Villanueva sa Jesus Is Our Lord Movement, kinsa magpapili sa pagkapresidente, iboto kaha sa iyang mga sakop? Mao nay dakong pangutana ug ang Ginuo ra ang nasayod niini.
PABORITO ANG SUGBO
Paborito ang Sugbo sa mga magpapili og national position gumikan sa kadaghan sa mga botante. Aduna nay dul-an 2 milyones ka botante ang Cebu Province ug dul-an usab sa usa ka milyon dinhi sa siyudad. Unya nabaniog man god nga dinhi midaog si Pres. Gloria Macapagal Arroyo niadtong 2004 elections. Walay labot kadtong tikas didto sa Maguindanao. Aw, mao nga balik-balikan gyod nila ang Sugbo.
(bgnalzaro@gmanetwork.com)
r