“Gani man iyang ginapaila ang iyang mga kandidato nga maoy solusyon sa problema sa katawhan.”
Tulo pa ka tuig gikan karon, apan daw nakita na sa katawhan sa nasud kinsa ang sunod nga sangunan nga mangulo ug molingkod sa Malacañang.
Sa panahon nga si Mayor Sara Duterte-Carpio nakig-uban sa mga kandidato sa Hugpong ng Pagbabago pagka-senador tuyok sa mga nagkadaiyang suok sa nasud, iya nang nakita ang mga problema nga ginasagubang sa katawhang Pinoy. Gani man, iyang ginapaila ang iyang mga kandidato nga maoy solusyon sa problema sa katawhan.
Ang iyang kasinatian sa pagdumala sa dakong siyudad sa Davao ngadto sa usa ka progresibong dakbayan, ang iyang maisugon nga pagbarog sa panahon nga nag-atubang sa krisis, ang iyang kaisog nga molaban sa iyang katawhan mga pipila lang sa kinaiya sa usa ka tinuod nga lider.
Kon sa panahon nga gipakaon ni Presidente Rodrigo Duterte og upos sa sigarilyo ang usa ka langyaw nga kunohay isog sa iyang termino pagka-mayor, nagpabiling lunhaw sa hunahuna sa katawhan ang kaisog ni Mayor Sara dihang iyang gidabudabuhan sa iyang kinumo ang sheriff nga wa makahulat sa iyang pag-abot una himuon ang demolisyon sa mga balay sa Soliman, Block 2 sa Agdao.
Dili layo nga siya mahimong ikatulo nga anak sa mga Presidente nga gipangunahan ni Presidente Gloria Macapagal Arroyo, Benigno Aquino III nga misunod kang kanhi Presidente Diosdado Macapagal ug Corazon Aquino.
Nailhan sab si Mayor Sara nga istrikto kon ang paggasto sa kuwarta sa gobyerno ang hisgutan apan bongga sab kon alang sa kalipay sa katawhan ang gastuhan.
Wala pay laing mayor nga nakahimo pagtumba og 100 ka baka ug gipakaon sa katawhan bisan sa panahon ni Presidente Duterte apan nahimo ni Mayor Sara sa ika-82nd Araw ng Dabaw.
Atangi kay atong ipadayon ang paghisgot sunod semana.