GIHITSAS na sa Davao City Police Office (DCPO) ang mga plano alang sa seguridad karong Semana Santa.
Kini ang gibutyag ni DCPO spokesperson Senior Inspector Ma. Theresita Plaza-Gaspan atol sa AFP-PNP Press Conference Miyerkules, Abril 3.
Sumala ni Gaspan nga plastado na ang security measures sa Davao City alang sa umaabot nga Mahal nga Adlaw.
“Well, hitsas natang tanan, naa na kita’y security plan for that, ug nakaandam na ang atong mga force multipliers,” ingon ni Gaspan.
Anaa sab sa maximum deployment ang pagpakatag sa mga personahe sa DCPO, uban sa Task Force Davao.
“Usa sa atong mga gibantayan diri ang mga simbahan ug mga retreat areas diin didto man gyod magtapok ang tawo, ug even ang atong mga beach resorts,” dugang ni Gaspan.
Lakip ang Land Transportation Office-Davao ang magbantay sa palibot diin ilang paneguraduhon nga anaa sa kondisyon ang mga public utility vehicles sa mga terminal ug subayon nila ang mga tukmang sumbanan aron masiguro ang kaluwasan sa mga pasahero.
Mokabat 1,500 ka mga pulis, militar ug force multipliers ang mobantay sa palibot aron maseguro nga luwas ang katawhan karong Holy Week nga magsugod Abril 15 ngadto nga sa Abril 21. (Richy F. Nalagon)