ANG Republic Act No. 11222, ang Simulated Birth Rectification Act, nga gipirmahan ni Presidente Rodrigo Duterte niadtong Pebrero 21, naglatid usab sa mas sayon ug yano nga administrative adoption proceeding alang niadtong mokorehir sa mga kaso sa simulation of birth.
Ang maong balaod naghatag og amnesty niadtong nakahimog simulation of birth nga gisilotan ubos sa Revised Penal Code. Ang pagkorehir niini giprotektahan sa maong balaod. Busa ang tanang papeles alang sa adoption di magamit nga ebidensiya sa pagpasakag kaso batok sa nakalapas.
Ang Section 6 niini nag-ingon, “all petitions, documents, records, and papers relating to adoption and rectification of simulated births” could not be “used as an evidence against those who simulated the birth of a child or who cooperated in the execution of such simulation in any criminal, civil, or administrative proceeding.
Kinahanglan nga ang mosagop usa ka Filipino citizen, hingkod ang panuigon, adunay full civil and legal rights, good moral character, wa makonbikto sa mga kaso nga naglambigit sa moral turpitude, makamatuto sa bata emotionally ug psychologically ug dunay katakus sa pagsuportar sa pagpadako sa bata.
Kon usa sa magtiayon nga mosagop langyaw, kinahanglan nga ang maong langyaw nakapuyo sa Pilipinas sa labing menos tulo ka sunod-sunod ka tuig sa wa ma ipasaka a petition for adoption.
Kinahanglan ang written consent sa bata nga pagasagupon kon nagpanuigon siya og 10 anyos pataas. Kinahanglan usab ang written consent sa mga legitimate, illegitimate ug adopted nga anak sa mosagop nga nagpanuigon og 10 anyos pataas, kon duna man gani.
Ang petition for adoption with an application for rectification of simulated birth record magsunod sa porma sa usa ka affidavit sa mga petitioner nga notaryado. Kinahanglan nga lakipan kini sa kopya sa simulated birth o kaha foundling certificate sa bata, affidavit of admission kon gihimo ang simulated birth sa laing tawo, certification sa barangay kapitan nga ang nagsagop ug ang gisagop nag-ipon sa pagpuyo sa maong barangay sud sa labing menos tulo ka tuig ug affidavit of two disinterested persons bahin niini.
Kinahanglan usab ang certificate gikan sa Department of Social Welfare and Development (DSWD) nga mahimong sagupon ang maong bata. Ang petisyon ipasaka sa social welfare and development office sa lungsod o syudad nga gipuy-an sa mipasaka sa petisyon.
Ang petisyon repasuhon, moagi sa regional director sa DSWD ug dayon sa kalihim sa DSWD. Kon i-grant ang petisyon, ang batang gisagop sama na sa legitimate nga anak sa nagsagop ug pareho na silag mga katungod ug obligasyon. - edbarrita@gmail.com