GAWAS sa mga plata porma de gobiyerno sa mga kandidato, usa sa mga manggawas nga isyo ning panahon sa eleksiyon mao ang kurapsiyon. Ang mga kandidato iyahay lang og labay og isyo sa matag isig ka kampo. Akusahan og kurapsiyon labi na gyud tong mga incumbent. Sa Kapitolyo, gipasiatab sa kampo nila ni Vice Gov. Agnes Magpale, kinsa maoy midagan sa pagka-gobernador ug sa running mate niini nga si Gov. Hilario Davide III nga limpyo ang ilang administrasyon. Walay mantsa ug lama sa kurapsiyon. Corruption free ang ilang administrasyon.
Dili sama sa ilang kaatbang nga si 3rd District Representative Gwen Garcia nga nabulit sa isyo sa kurapsiyon. Si Gwen nag-atubang og mga kaso sa Ombudsman gumikan sa pagtukod sa Cebu International Convention Center (CICC) ug gumikan sa pagpalit sa Balili Property. Apan ang sa CICC na-dismissed na.
Nadutlan ug gihukman nga tangtangon man tuod siya sa Ombudsman kalabot sa Balili property issue, apan wala gi-implementar sa Ubos Balay Balauranan. Aduna usay pending apelasyon si Gwen sa CA.
Si Magpale limpyo siguro gumikan kay wala pa man siya mahimong gobernador. Apan si Davide dili makapangangkon nga limpyo ang iyang administrasyon gumikan kay nabulit usab kini sa isyo sa kurapsiyon. Daghang mga anomaliya nga nahimo ang mga alipores ni Davide nga wala niya aksiyoni. Posible nga nahibalo siya niini apan nagpaka-buta-bungol lang o kaha apil siya sa bahin.
Dili diay na kurapsiyon nga gitayupi ang bidding sa pagpalit og mga heavy equipment diin ang highest bidder maoy gipadaog? Ang anomaloso nga bidding sa security provider sa Kapitolyo? Ang pagpangawat og emburnal sa usa sa mga sinaligan sa gobernador? Ang pagdawat og gasa sa usa sa mga department head gikan sa usa ka hauler og sand and gravel? Kanang pagtukod og 20 ka andana nga edipisyo nga gipamugos gyud ni Davide? Wala kaha silay gi-apas ana nga komisyon? Dili makapangankon si Davide nga limpyo ang iyang administrasyon kay daghan usab kini og mga anomaliya. Pareho ra sila. ((bobbygnalzaro@gmail.com))