SA NIAGING semana, ang Philippine Drug Enforcement Agency (PDEA) pinangulohan ni Aaron Aquino ang mibutyag nga adunay 31 ka mga celebrities o mga artista sa nasod – 20 ka lalake ug 11 ka babaye - ang nalambigit sa pagpakatap sa gidiling drugas. Iyang gihulagway nga ang uban niini mga hosts sa television program ug nga gialegahang tigpayuhot og mga party drugs sama sa ecstacy.
Pero sa dihang gihagit sa pagbutyag sa mga pangalan niini ngadto sa publiko aron kalikayan nga maduhig ug malakip sa pagduda ang mga inosenti nga anaa sa industriya, si Aquino nagdumili sa pagbuhat sa ingon sa rason nga nagkinahanglan pa kini og validation sa ilang ahensiya.
Ning bag-ohay lang, si Aquino mipahibawo na usab sa publiko nga adunay 13 ka mga judges ug 10 ka mga prosecutors ang anaa sa narco-list ni Duterte.
Sa tinguha nga mahatagan og kaangayan ang ubang mga inosenting huwes, gihagit na usab sila sa paghingan niini. Gani ang Supreme Court mipadayag sa ilang kaandam nga mohimo gilayon og imbestigasyon.
Apan unsang pagka unsaa nga imbis makig-ayuda, nagdumili man hinuon ang PDEA sa paghatag og kopya ngadto sa SC alang unta sa ilang makuting pakisusi. Ingon ni Aquino nga nagkinahanglan pa usab kini og validation aron gyud pagsiguro sa alegasyon.
Kon dali ra kaayong nakahingalan ang maong ahensiya niadtong 46 ka mga narco politicians nga naglangkob og gobernador ug mga mayor, nganong dili man kini nila mahimo sa mga artista ug sa mga huwes?
Unsa man diay ilang basehan sa pagladlad sa mga pangalan sa mga dagkong opisyal o mga inilang personalidad nga nalambigit drugas?
Tungod niining perming pa-thrilling o paukyab sa PDEA, daghan na karon ang gibati og kahinam ug kabalaka tungod kay sa pagkakaron daghan usab ang naangin sa mga pagduda.