DAGHANG kilay ang nisaka niining pagpahibawo ni Cebu City Mayor Tomas nga iyang padak-an ang mga allowances nga iyang ihatag ngadto sa mga huwes.

Buot ipasabot ni Tomas nga kon pilay suweldo sa usa ka huwes sud sa usa ka buwan niini, iya kining tugbangan sa allowance nga iiyang ihatag.

For updates from around the country, follow Sun.Star on Twitter

Kon magdawatan ang mga huwes og P40 mil ang buwan ngadto sa P80,000, mao usab kini ang iyang madawat nga allowance nga gikan sa mga magbubuhis sa dakbayan sa Sugbo.

Pagkabulahan kining atong mga huwes sa Sugbo. Gipangga sila og maayo sa mayor sa rason nga ang mayor ra sab ang nahibawo.

Matod ni Tomas, nga iya kining gibuhat aron nga mapalig-on ang hukmanan ug mapugngan usab ang kurapsyon niini.

Adunay 27 ka mga huwes nga naglangkob sa Municipal ug Regional Trial court kansang mga suweldo niini nagdepende sa ilang gidugayon ug sa ilang rango.

Gibanabana nga moabot ngadto sa P2 milyones kapin matag buwan o P24 ngadto sa P25 milyones sa usa ka tuig ang igahin sa dakbayan. Sa ato pa, aduna na gyud diay saktong pundo ang dakbayan sa Sugbo nga ingon na man niini ka bongga ang gihimo sa mayor. Kini maoy bunga sa pag-ugmad sa South Reclamation Project (SRP). Apan wa ba kaha masipyat ang mayor sa iyang prayoridad nga kini man ang iyang giuna?

Unsa na man diay ning naglubaklubak nga kadalanan sa dakbayan, ang sagbot nga natipun-og ug ang drainage nga wa na gyud mahatagi og pagtagad? Hain na man diay ang gipanghambog sa mga opisyales nga “Asphalt Storm?”

Sa laing bahin, unsa man kaha karoy baruganan sa mga huwes? Dili kaha kini nila mahulagway nga usa ka suborno?

For the record, ang dakbayan sa Sugbo adunay pipila ka mga pending cases nga gihuptan sa pipila ka mga huwes.