SUPERBALITA CEBU

Mga hulga sa 2 ka mga lungsod milurang: CPPO

DUHA ka mga lungsod sa probinsya sa Sugbo nga nabutang sa red category sa Police Regional Office 7 ug Commission on Elections (Comelec) tungod sa init nga dagan sa pulitika ug presensya sa armadong mga grupo gi-downgrade na sa orange.

Kini nagpasabot nga di na kuyaw alang sa nagsingabot nga eleksyon.

Adunay 14 ka mga lugar sa probinsya sa Sugbo ang napaubos sa election watchlist areas (Ewas) tungod sa kainit sa dagan sa politika samtang nagkaduol na ang May 13 mid term elections.

Dunay unom ka mga lungsod ubos sa yellow category samtang walo ang orange category nga matawag ni Police Col. Manuel Abrugena nga normal ra tungod sa eleksyon.

Sa 14 ka mga lungsod ug syudad, duha niini gibutang sa red category.

Kon ang lugar ubos sa red category, nagpasabot nga grabe ang pulitikanhong panagribal.

Gawas niini, aduna pay presensya sa armadong grupo nga posibling gigamit sa mga kandidato.

Ang duha nga naa kanhi sa red category mao ang mga lungsod sa San Fernando ug Tuburan.

Ang lungsod sa San Fernando gihakop sa kahadlok human sunodsunod nga gipamatay ang pipila ka mga piniling opisyal.

Nisamot kini human giingong dunay kill list alang sa pipila ka mga kandidato.

Apan matod ni Abrugena, hepe sa Cebu Provincial Police Office, nga sa pagkakaron ila nang gi-downgrade ngadto sa orange category human mamatikdi nga milurang ang kainit sa pulitika sa duha ka mga lungsod.

Wa na usab silay nakita nga hulga gikan sa mga armadong grupo.

“Base po kasi sa parameters natin, nag-mellow down po yung duon po sa red tag. Nagkaroon po ng decrease sa political rivalries. Yung presence po ng suspected activities po ng CNN at saka po yung presence po ng armed groups, kaya nag downgrade po tayo,” matod ni Abrugena.

Gipasabot hinuon sa CPPO director nga padayon ang ilang monitoring sa 14 ka mga lungsod ug syudad sa probinsya ilabi na nga nagkaduol na ang piniliay ug nagsugod na usab ang pagpangampanya sa lokal nga mga kandidato.

Kon mobalik ang kainit sa dagan sa politika mahimong isaka na usab sa kapulisan ang category ug patutukan hangtod na sa adlaw sa eleksyon.

Usa sa nakatampo nga nilinaw ang lungsod sa San Fernando ug Tuburan tungod sa padayon nga peace covenant ug sabot-sabot sa matag kampo sa mga politiko nga iagi lang sa limpyo nga way dinautay nga pagpangampanya

Sunod semana, ipadayon sa kapulisan sa probinsya ang “Padyak para sa malinis at mapayapang halalan” sa mga lungsod nga nabutang sa Ewas.

Sugdan nila ang maong programa sa lungsod sa Tuburan sa Abril 13 uban ang stakeholders ug Comelec lakip na ang AFP.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph