PADAYON nga misaka ang mga kaso sa dengue sa Central Visayas diin nag-una na ang rehiyon sa labing daghan og kaso lukop nasod.
Sa labing uwahi nga datus sa Regional Epidemiology and Surveillance Unit (RESU) 7, nakatala na og 6,097 ka mga kaso sa dengue ang Central Visayas sukad Enero hangtod Abril 3 ning tuiga.
Si Dr. Ronald Jarvik Buscato, program coordinator sa dengue sa Department of Health (DOH) 7, nihulagway nga “very alarming” na kini nga kahimtang sanglit first quarter pa lang sa tuig, taas na ang mga kaso.
“It’s too early. We just end the 1st quarter and ingon ana na kadaghan ang atong kaso,” matod ni Buscato.
Dugang niya nga nisaka na pud ang mga kaso sa namatay sa dengue diin anaa na sa 37 ka mga tawo.
Sagad sa hinungdan sa kamatayon mao ang komplikasyon sa maong sakit sama sa hypotensive shock, disseminated intravascular coagulation, ug uban pang komplikasyon.
Ang pagsaka sa kaso sa dengue ning tuiga 245% nga taas kon itandi sa susamang petsa sa 2018. Natala ang 1,768 ka kaso ug 12 ka patay sa susamang petsa sa 2018.
Kon magpadayon kini, posible nga malabwan niini ang 260% nga pagsaka sa kaso sa 2016, diin kini ang giingon nga epidemic year.
Dugang ni Buscato nga aduna na’y gipanghimo ang tagsa-tagsa ka mga local government unit aron mapugngan pa ang pagdaghan sa kaso sa dengue hilabi na karon nisud na ang El Niño.
Gibutyag usab niya nga ang siyudad sa Sugbo anaa na sa 3rd cycle sa ilang spraying og mosquito insecticides.
Ang uban usab subsob ang pagpahinumdum sa matag komunidad sa paghimo sa 4S hilabi na ang search and destroy sa mga breeding sites sa lamok nga magdala sa dengue virus.