ANG 17 anyos nga suspek sa pagpatay kang Christine Lee Silawan namasangil sa mga sakop sa National Bureau of Investigation (NBI) nga nanghulga ug nipugos kaniya sa pag-angkon nga siya ang main suspect sa kaso.
Sa iyang 11-ka pahina nga affidavit nga giduso ngadto sa Lapu-Lapu City Prosecutor’s Office, ang 17-anyos, kinsa girepresentahan ni manlalaban Vincent Isles, namasangil nga human siya masikop sa NBI 7 operatives, gipugos siya sa pagpaangkon sa krimen pinaagi sa pag-torture ug paghulga kaniya.
Si NBI Asst. Director Dominador Cimafranca, dihang gikuhaan og reaksyon sa Sunstar Cebu, nidumili pagtubag kay dunay "gag order" ang prosecutor's office kanila.
Gawas sa 17-anyos, laing lima ka mga tawo ang ningduso sa ilang testimoniya agig suporta sa iyang counter-affidavit, labina sa iyang nahimutangan dihang si Silawan gipatay sa gabii sa Marso 10.
Si Isles niawhag usab sa Lapu-Lapu City Prosecutor’s Office sa pagpatawag sa usa sa mga saksi sa NBI 7 alang sa clarificatory hearing human ang saksi giingong nisulti kanila nga ang mga alegasyon batok sa 17-anyos gigama-gama sa ahensya.
Sa iyang affidavit, ang 17 anyos nga suspek namasangil sa NBI 7 nga nidakop kaniya human sa ronda sa iyang balay sa Marso 16, ug nidala kaniya sa rehiyonal nga buhatan sa Siyudad sa Sugbo, ug didto giingon nga gipugos siya sa pagpaangkon sa krimen pinaagi sa nagkadaiyang pamaagi.
Sa iyang alegasyon, siya gipatan-aw sa CCTV footages nga nakuha sa NBI 7 ug gipugos siya sa pagpaangkon nga siya ang tawo nga naa sa mga video.
Matod niya nga samtang siya gigaling sa pagpangutana, laing agent nga diha sa iyang likod nihapak og libro sa iyang likod.
Lain pa niyang pasangil mao nga ang NBI operatives nipugos sa pagpahubo kaniya alang sa physical examination ug nikuhag hulagway nga way pagtugot kaniya.
Dihang nakakita sila og marka sa iyang lawas nga pinaakan sa lamok, giingong gipugos siya sa NBI operatives sa pag-angkon nga kini mga kinawrasan gikan ni Christine Lee.
Dugang niya nga gipugos siya sa mga operatiba sa pagpirma og mga dokumento ug kon magdumili siya, ang iyang maguwang mahiagom sa iyang gidangatan.
“One of them also punched me in the stomach to compel me to sign. Finally they told me that if I sign the paper, they’ll let my mother see me. So I signed the paper, but they did not let me see my mother,” matod sa suspek.
UYAB SILA
Giangkon sa 17 anyos nga suspek nga uyab sila ni Silawan apan nilanat ra kini og lima ka adlaw.
Siya niingon nga nakahukom siyang makigbuwag kang Silawan kay ang buhok niini kanunay kalkag (messy).
Bisan kon sila nagkabuwag, nagpabilin silang managhigala sa Facebook, apan nag-communicate hangtod lang sa Hunyo sa miaging tuig.
Sukad sila nagkabuwag, wa na sila personal nga nagsultihanay ug magteksanay.
Siya nangangkon nga alas 6 sa gabii sa Marso 10, usa ka oras sa wa pa patya si Silawan, diha ra siya sa basketball court duol sa ilang balay nagduwa uban sa iyang mga higala.
Nagduwa siya uban sa iyang mga higala alas 5 sa hapon ngadto sa alas 7 sa gabii, nga gisuportahan usab sa duha ka mga saksi nga nakakita kaniya sa samang adlaw ug oras.
Human sa duwa, nipauli ang suspek sa ilang balay mga alas 7 sa gabii dihang si Silawan gipatay.
Laing saksi niingon nga ang suspek naa ra sa ilang balay alas 7 ngadto sa alas 9 sa gabii sa samang adlaw.
BIRTHDAY
Gipasabot sa Kagamhanan sa dakbayan sa Lapu-Lapu nga magpabilin gihapon sa Homecare Center ang 17-anyos nga suspek.
Kini bisan pa kon karong adlawa, Abril 4, magsaulog na kini sa iyang ika-18 ka tuig nga adlaw nga natawhan.
Matod ni Lapu-Lapu City Mayor Paz Radaza nga kon way kamandoan sa korte nga dili na pwedi sa ilang pasilidad ang suspek, andam gihapon moatiman ang mga city social welfare kaniya sanglit ang ilang pasilidad alang sa pagkustodiya sa mga menor de edad nga adunay giatubang nga mga salaod sa balaod.
Di pa ang 17-anyos ang labing tiguwang na unya nga anaa sa ilang pasilidad sanglit aduna silay 25-anyos.
Ang 17-anyos nipaubos sa kustodiya sa Homecare Center nga boluntaryo alang sa iyang seguridad.
“Sa amoa, we’re just waiting for instruction or unsay order from the prosecutor because this thing happened and the order was given to the prosecutor. So, sila may ni kuan nga under our care, so, mao na siya. Anyway ni voluntary man sad pud ang mother,” pagpasabot sa mayor.
DI MAKALUBOG
Samtang gipadayag sa mayor nga wa niya nakita nga makalubog sa kaso ni Christine Lee ang managlahing resulta sa autopsy sa mga owtoridad ug sa Public Attorney’s Office (PAO) kalabot sa pagpatay kang Christine Lee.
Kini gumikan kay kanunay usab ang koordinasyon sa maong mga ahensya.
Nanghinaot lang ang mayor nga masulbad ang kaso sa dalagita sa labing daling panahon aron usab maka move-on na sa hingpit ang pamilyang Silawan nga gihulagway sa mayor nga wa pa makarekober sa nahitabo.
Si Police Colonel Limuel Obon, director sa Lapu-Lapu City Police Office, nibutyag nga ilang paninguhaon nga sa di pa mapupos ang 60 ka adlaw nga pagresolbar sa kasong gisang-at sa NBI batok sa 17-anyos, ilang masikop ang ubang suspek.
Subling gibarogan ni Obon nga idlas sa kapulisan ang ilang mga gipangita sa pagkakaron.