DILI magamit ang mga asosasyon diha sa kabarangayan sa mga walhong pundok pinaagi sa giorganisa nga rallies.
Kini ang tinguha sa kapulisan sa dakbayan sa Mandaue hinungdan nga mohimo sila og pakigpulong sa mga barangay nga giila nila nga white area committee.
Adunay pito ka mga barangay nga giila ang Mandaue City Police office (MCPO) nga adunay mga asosasyon nga gigamit sa mga sakop sa white area committee o pwersa sa mga walhong grupo nga naa sa mga sentrong dapit.
Gipasabot ni Police Colonel Julian Entoma, direktor sa MCPO, nga mao kini ang mga mobilize o organizer sa mga walhong pundok o mas naila nga cause-oriented groups.
Ang mga barangay mao ang Labogon, Paknaan, Looc, Umapad, Pagsabungan, Tipolo ug Subangdaku.
Dugang pagpasabot ni Entoma nga adunay mga walhong grupo nga mogamit lang sa mga sakop sa pipila sa mga asosasyon, sama sa mga manindahay, diin maenganyo ang maong mga sakop nga mokuyog sa ilang mga himuong lihuk protesta batok sa programa sa gobyerno bisan kon wala makasabot o makahibawo sa ilang gi-rally-han.
“Ang ato himuon is pagpahibaw sa barangay opisyal ani nila nga sakop, ug mas maayo nga moapil sa atong pakigpulong ang mga myembro sa asosasyon, kay sila ang luom kay gisakyan lang sila, gigamit lang sila,” matod ni Entoma.
Dugang ni Entoma nga dili man hinuon armado ang maong mga sakop sa white area committee.
Kini human nga sila sa mga pulis, kapila na kahigayon nga mohimo og pag-secure sa mga himuong rally sa nagkadaiya nga cause-oriented group, gani aduna pay mga bata nga apilon sa pagdala.
Kon adunay kagubot nga mahitabo, adunay masikop, diha nila masuta nga mga sakop kini sa asosasyon nga wala gani kahibawo sa rason nga nagsaba-saba sa gawas sa buhatan sa gobyerno o diha sa kadalanan.
Dugang ni Entoma nga ang ubang sakop sa asosasyon hayluon lang sa kwarta ug pagkaon.
Si Teody Navea, secretary general sa Sanlakas Cebu, nihulagway nga ang himuon sa MCPO, pamaagi sa pagpugong sa freedom of expression. Ug iyang gipasabot nga wala sila nanggamit sa maong mga sakop sa nagkadaiya nga asosasyon, kundi ang ila ang pagtabang sa mga naglisud nga makapagawas sa ilang yangungo ngadto sa gobyerno.
Sama nalang sa mga informal settlers nga papahawaon sa lugar nga walay saktong relokasyon.
Dugang ni Navea nga sa ilang grupo, ang ihatag nga pagkaon sa mga mokuyog sa ilang lihuk protesta, kini aron dili magutman ang kaubanan ug kon aduna may kwarta, kini agig, pag-reimburse sa magasto diha sa pamilete sa ilang mga sakop, kon walay sakyanan nga makuha.
“Kon nanggamit pa mi, like for example kato nahitabo before sa may Subangdaku, dapat nakinabang na mi. Dili man ingon ana ang pamaagi sa cause-oriented, ang amo pamaagi, dili lang rally. Kon tabangan gani namo dili man rally ra ang pamaagi naay daghan. Like negotiate sa local government, mohimo og mga petition or what, basig diha sila nasuko kay gamiton kuno sa rally. In the first place, kon decision sa mga tawo nga mo-rally, we support. Dili kay pagsud namo, motabang unya amo silang’ i-agitate nga dapat mag-rally mo. Mao na amo, I don’t know sa uban, cause I can’t speak on their behalf,” pagpasabot ni Navea sa Superbalita Cebu.
Hinuon, giklaro ni Entoma nga wala sila’y pagbatok sa mga cause-oriented group, kundi likayan lang usab nila nga adunay uban unya nga sakop sa asosasyon nga mahaylo nga magpabukid ug mogunit na og armas isip usa na ka rebelde.
Dugang ni Entoma nga ila kini nga hollistic approach aron pagbungkag na gyud sa hingpit sa insurgency.
Gitataw usab niya nga insurgency-free ang Mandaue ug hinuon nila ang pagpakigpulong sa mga hingtungdan nga barangay human na sa piniliay aron dili magaamit sa pamolitika.