DI MAILAD.’ ‘Di mabaligya.’ Mao dayon kini ang nasulti sa akong mga amigo sa media dihang nitimbaya si Tom Rodriguez og larinong Binisaya kay may kagikan sa Leyte. Lingaw ikaistorya si Tom nga sige lang og ngisi ug katawa.
Dinhi sa Cebu sila si Tom, Joyce Ching ug Edgar Allan Guzman alang sa mall show sa bag-ong teleserye sa GMA 7 nga Dragon Lady. Wa makakuyog ang bida gyud nga si Janine Gutierrez tungod sa kakulian.
Ang mga karakter sa tulo (Michael Chan kang Tom, Astrid Chua kang Joyce ug Goldwyn Chen kang EA) kanunay makauban sa karakter ni Janine (Celestina Lim) kinsa natawo nga may pagka-dragon ang hitsura.
Magribal sa gugma ug negosyo si Astrid ug Celestina ug kini ang hinungdan nga himoong miserable sa nahauna ang kinabuhi ni Celestina. Nagsunod sa Eat Bulaga ang Dragon Lady nga mahitungod sa gugma, pagpanimalos ug sa pagsimba sa Dragon.
•••
Nahaulpot gyud tinuod ang mga kauban nako pagtan-aw sa Eerie. Dunay usa nga nahadagan ug nikatawa na lang pagkahuman.
Gawas sa mga madre ug sa paghikog, lahi ra diay ang istorya niini sa nahaunang hadlokhadlok sab nga pelikulang The Nun. Nalingaw ra ko.
•••
Sa kaulohan, gipasundayag karon ang musical play nga Ang Huling El Bimbo. Pila sa mga kauban sa media nakakita ug nihulagway niini nga nindot.
Igo na lang ko sa pagpanghinaut nga makalayat ko sa kaulohan sa di pa mahuman ang maong pasundayag karong bulana.
•••
Hapit na ang Semana Santa. Kon makalugar, basin molayat ko sa Bantayan o Calubi-an (Leyte). Kon di, sa akong lungsod nga natawhan sa Oslob ra ko magyampungad.
Puno sa kalihukan bahin sa pagtoo kining mga lugara nga gawas nga apilan sa mga lumulupyo, dugokon usab sa mga nangusyoso nga mga turista gikan sa sulod ug gawas sa nasud.
•••
Ang actress-vlogger-entrepreneur nga si Jessy Mendiola ang bag-ong guest editor sa ABS-CBN Lifestyle Inspo, bag-ong multimedia maven nga gikan sa TV ug pelikula ngadto sa digital field.
Ipakita dinhi ni Jessie ang iyang negosyong mga sinina nga Señorita, ang pagka YouTube vlogger ug pagka certified diver.